Mirëpo, prapa këtij spektakli të trilluar propagandistik fshihet një e vërtetë e pamohueshme teknike, ligjore dhe financiare. Mjeti i reklamuar me pompozitet si “Made in Albania” është faktikisht një Toyota Land Cruiser 70 Series që prodhohet në Japoni (veçanërisht modeli Land Cruiser 76 apo HZJ76 / GRJ76 / GDJ76 në konfigurim taktik 5-dyresh), një produkt tërësisht japonez i njohur botërisht për rezistencën në terrene të vështira dhe që përdoret gjerësisht nga ushtritë, forcat e sigurisë apo organizatat ndërkombëtare si OKB dhe NATO.

Mashtrimi me çmimet, specifikat teknike dhe prapaskena e kompanisë “Timak Defence”

Për të realizuar këtë skemë abuzive dhe për të anashkaluar me çdo kusht procedurat e tenderave të hapur publikë, qeveria përdori kompaninë “Timak Defence” dhe çiftin Yaffet-Veliu për t’i paketuar mjetet e importuara nga Japonia si pretenduar “prodhim vendor”. Automjetet japoneze thjesht i janë nënshtruar disa modifikimeve vizuale dhe pajisjeve taktike sipërfaqësore, ku përfshihen snorkel për kalimin e ujërave të thella dhe mbrojtjen e motorit nga pluhuri, rrjeta mbrojtëse metalike në xhama, trare çatie (roof rack) për kanistra karburanti apo uji, mbrojtëse metalike dritash, parakolp me tullumba (winch) si dhe veshja me ngjyra kamuflazhi ushtarak.

Në tregun ndërkombëtar, një Toyota Land Cruiser 76 e re kushton nga $45,000 deri në $65,000 (€40,000 – €60,000) në varësi të motorit (2.8L Turbo Diesel, 4.0L V6 Gas, apo 4.5L V8 Turbo Diesel), ndërsa në tregun e mjeteve të përdorura sillet midis €20,000 dhe €40,000. Netë nga këto modifikime ushtarake, çmimi i plotë për versionet taktike me pajisje speciale arrin maksimumi nga $70,000 deri në $120,000+. Ndërsa kryeministri deklaron se po prodhohen aktualisht edhe 14 zjarrfikëse të reja nga e njëjta kompani, klasifikimi i rremë i mjeteve japoneze si “prodhim kombëtar” ka shërbyer vetëm si pretekst për të shmangur garën, për të fryrë faturat në mënyrë marramendëse dhe për të grabitur miliona euro pa tender nga buxheti i shtetit.

Fije sekrete pas “Made in Albania”

Por për të kuptuar se si një automjet i importuar nga Japonia u shfaq me flamurin shqiptar si arritje vendase, duhet zbërthyer me kujdes skema financiare dhe politike që u ndërtua prapa skenës gjatë muajve të fundit. Në qershor të vitit 2025 ndodhi një transaksion sa i çuditshëm, aq edhe komprometues për biznesin në Shqipëri. Arjeta Puca, pronare e kompanisë “Timak” – e trumbetuar me të madhe nga qeveria dhe e promovuar personalisht nga kryeministri Edi Rama – vendosi të shesë 49% të aksioneve të kësaj shoqërie për një çmim qesharak prej vetëm 490 eurosh. Blerësi nuk ishte një emër i zakonshëm, por Ron Yeffet, një biznesmen izraelit me nënshtetësi shqiptare, i njohur si mik mjaft i afërt i kryeministrit.

Prapaskena e kësaj shitjeje skandaloze u zbardh në datën 4 gusht 2025. Shoqëria shtetërore ushtarake “KAYO”, e drejtuar nga Ardi Veliu, themeloi shoqërinë e përbashkët “Timak Defence” (e zotëruar 80% nga Timak dhe 20% nga KAYO). Objektivi i saj real ishte marrja e monopolit absolut për furnizimin e ushtrisë, policisë, gardës dhe emergjencave civile me automjete. Kompanisë i u fal edhe godina e ish-televizionit “News 24” në Shkozë, ku vetëm 5 ditë pas marrëveshjes, qeveria zbriti ushtrinë dhe policinë për të zbuluar ambientet. Skema financiare shpërtheu menjëherë. Nga shtatori deri në nëntor 2025, buxheti i shtetit i kaloi kësaj kompanie mbi 10.5 milionë euro përmes dy kontratave sekrete: 6.1 milionë euro për sistemin anti-dron C-UAS dhe 4.4 milionë euro për automjete taktike. Blerjet u realizuan pa garë dhe pa asnjë procedurë transparente prokurimi publik.

Përmes bazës së re ligjore, “KAYO” gëzon statusin e furnizuesit parësor: institucionet shtetërore janë të detyruara të blejnë nga ajo, ndërsa klasifikimi i kontratave si “sekret ushtarak” shmang tërësisht Agjencinë e Prokurimit Publik (APP). Ish-zëvendëskryeministri Arben Ahmetaj denoncoi publikisht këtë aferë, duke deklaruar se “KAYO” u krijua me vendime ekstraligjore posaçërisht për të pasuruar mikut privat të kryeministrit, Ron Yeffet. Ahmetaj zbuloi gjithashtu prapaskenat e mëparshme të Yeffet në Shqipëri: tentativat për t’i kaluar borxhin publik në 2018-ën, përpjekjen për të tjetërsuar truallin e Ambasadës Shqiptare në SHBA (e bllokuar nga Ditmir Bushati), si dhe ndërrimin e komandantit të Forcave Tokësore për të lehtësuar grabitjen e pronave të ushtrisë. Ndërsa në Senegal qeveria e re ia anuloi Yeffet-it kontratat korruptive bregdetare, në Shqipëri ai siguroi monopolin e financave të ushtrisë, i mbrojtur nga pushteti i Ramës dhe Ardi Veliut.