27 Gusht 2026

Nga: Gazeta Sot.

Një komunikim i atribuuar Ermir Ndreajt, i njohur si “Cinco”, është një prej detajeve që bie në sy në materialet e dosjes belge ku hetohet veprimtaria e një rrjeti ndërkombëtar të trafikut të kokainës. Në bisedë, Ndreaj diskuton për investime me vlerë miliona euro dhe, në një moment, shkruan se “edhe kryeministri i Shqipërisë merr pjesë”. Sipas materialeve të bëra publike nga media belge “Het Laatste Nieuës”, Ndreaj dyshohet se kishte një rol logjistik dhe koordinues në aktivitetet e një grupi kriminal, duke u marrë me transportet, magazinat, njerëzit dhe situatat që kërkonin ndërhyrje të menjëhershme. Një prej episodeve më të detajuara të dosjes lidhet me një ngarkesë me produkte ushqimore të ardhur nga Ekuadori.

Në dokumentet e transportit bëhej fjalë për ton, por hetuesit zbuluan se brenda një pjese të ngarkesës ishte fshehur pastë kokaine. Një nga komunikimet e cituara në dosje tregon nivelin e shqetësimit brenda grupit kur një prej operacioneve rrezikonte të dështonte. Në një mesazh, Ndreaj shkruante se në duart e grupit ndodheshin rreth 30 milionë euro mall dhe se ngarkesa duhej larguar sa më shpejt. Sipas përshkrimit të medias belge, ai vepronte në një mënyrë që e vendoste më shumë në rolin e koordinatorit sesa të personit që merrej drejtpërdrejt me drogën. Kur shfaqej një problem, telefonatat drejtoheshin te “Cinco”. Një tjetër episod i dosjes lidhet me një magazinë në zonën e Beveren-Melsele.

Aty u dërguan 796 kuti, që përmbanin mbi 38 mijë kanaçe ton. Sipas hetimeve, në 141 prej kutive ishte fshehur pasta e kokainës. Pasi ngarkesa mbërriti në magazinë, nisi nxjerrja e substancës së paligjshme nga kanaçet. Operacioni rezultoi shumë më i ngadaltë nga sa ishte parashikuar. Fillimisht, personat që punonin aty përdornin hapëse të zakonshme kanaçesh. Puna u përshpejtua vetëm pasi u siguruan mjete të tjera dhe më vonë edhe pajisje elektrike industriale. Situata u komplikua kur personat që ndodheshin në magazinë vunë re lëvizje dhe drita në ndërtesat përreth.

Dyshimi se mund të kishte mbërritur policia shkaktoi alarm te personat e përfshirë. Sipas dosjes, u dhanë udhëzime që ngarkesa të largohej dhe bashkëpunëtorët nisën të kontaktonin njëri-tjetrin. Në këtë moment, emri i Ndreajt del sërish në komunikime. Ai dyshohet se ishte një prej personave që aktivizohej kur operacioni dilte nga kontrolli. Pikërisht ky episod përdoret nga prokuroria belge për të argumentuar se “Cinco” kishte një funksion më të rëndësishëm brenda rrjetit sesa një ekzekutues i thjeshtë.

Nga biznesmeni i jetës së natës te dosjet e kokainës

Përpara se të shfaqej në dosjet e trafikut të drogës, Ndreaj ishte i njohur në Shqipëri dhe Belgjikë për aktivitetet e tij në biznes dhe jetën e natës. Emri i tij është lidhur me klubin “Cinco Cavalli” në Durrës, ndërsa më pas ai u përfshi edhe në biznese të sektorit të estetikës dhe bukurisë në Shqipëri dhe Belgjikë. Sipas materialeve të publikuara nga media belge, ai jetonte në një rreth ku luksi ishte pjesë e përditshmërisë.

Në dosje përmendet edhe një orë Richard Mille, me vlerë rreth 200 mijë euro, e cila sipas hetuesve ndihmoi në procesin e identifikimit të tij. Prokuroria federale belge e përshkruan Ndreajn si një person të besuar të boshnjakut Sani Al Murdaa, i njohur si “Shade”, të cilin autoritetet e konsiderojnë një prej figurave të rëndësishme të rrjetit. Sipas këtij përshkrimi, Al Murdaa merrej me kontaktet ndërkombëtare dhe furnizimin, ndërsa Ndreaj dyshohet se merrej kryesisht me funksionimin e operacioneve në Belgjikë.

Miliona euro dhe planet për investime

Përveç komunikimeve për transportet e drogës, në dosje shfaqen edhe biseda që lidhen me investime të mëdha. Në një prej tyre, Ndreaj diskutonte për blerjen e një hoteli dhe pronave përreth tij. Shuma e përmendur për investimin ishte rreth 15 milionë euro. Në të njëjtin komunikim, ai fliste për mundësinë që vlera e pronës të rritej ndjeshëm brenda disa viteve. Në këtë kontekst shfaqet edhe një referencë për kryeministrin Edi Rama, ku Ndreaj shkruante: “Edhe kryeministri i Shqipërisë merr pjesë.”

Nga materiali i publikuar nuk rezulton që në atë komunikim të jepen të dhëna të tjera që shpjegojnë se çfarë nënkuptonte konkretisht kjo deklaratë. Një tjetër element i rëndësishëm në dosje janë komunikimet përmes platformës së koduar Sky ECC. Pas ndërhyrjes së autoriteteve dhe zbardhjes së komunikimeve, hetuesit nisën të analizojnë bisedat e personave të dyshuar si pjesë e rrjeteve të trafikut ndërkombëtar të drogës. Sipas dosjes, një prej llogarive u lidh me Ndreajn përmes disa elementeve të ndryshme, mes tyre dokumente gjyqësore, referenca ndaj emrit të tij dhe komunikime që lidhen me jetën personale.

Në një rast, përdoruesi i llogarisë kishte reaguar pasi emri “Cinco” ishte shfaqur në një artikull mediatik. Identifikimi u mbështet edhe në elemente që lidheshin me orën Richard Mille të Ndreajt, e cila ishte raportuar e vjedhur në Barcelonë. Megjithatë, mbrojtja e tij ka kundërshtuar mënyrën se si është bërë identifikimi dhe përdorimin e komunikimeve si prova.

Qindra kilogramë kokainë dhe laboratorë për përpunimin

Dosja “Kookëas” përfshin disa episode të lidhura me futjen dhe përpunimin e kokainës në Belgjikë. Sipas materialeve të hetimit, nga ngarkesat me produkte ushqimore u nxorën sasi të mëdha paste kokaine, e cila më pas dërgohej në laboratorë ku përpunohej. Një prej laboratorëve të zbuluar në Marcinelle kishte një sipërfaqe prej rreth 550 metrash katrorë. Sipas llogaritjeve të përfshira në dosje, vetëm nga një prej ngarkesave mund të jenë nxjerrë rreth 225 kilogramë kokainë. Për tre transportet e përmendura në hetim, sasia e përllogaritur arrinte rreth 550 kilogramë. Vlera e mundshme e kësaj sasie, sipas llogaritjes së përdorur në dosje, mund të arrinte në rreth 16.5 milionë euro.

Dënimet në Belgjikë dhe hetimi në Shqipëri

Çështjet gjyqësore ndaj Ndreajt në Belgjikë kanë sjellë disa dënime. Në qershor 2025, ai u dënua me 6 vite burg në çështjen “Frank de Tank”. Pak kohë më pas, në një procedim tjetër të lidhur me drogën, mori një tjetër dënim prej 7 vitesh burg. Në shkurt 2026, në kuadër të dosjes “Kookëas”, atij iu dha edhe një dënim prej 12 vitesh burg. Ndërkohë, Ndreaj ishte arrestuar në Shqipëri në korrik 2025, në kuadër të një hetimi të SPAK. Sipas të dhënave të publikuara për hetimin shqiptar, çështja lidhet me një sasi shumë të madhe droge, ku përmenden mbi 8 tonë lëndë narkotike, prej të cilave më shumë se 7.2 tonë kokainë.

Më 8 korrik 2026, SPAK njoftoi dërgimin për gjykim të dosjes ndaj 15 personave të pandehur. Avokati i Ndreajt, Ëalter Damen, ka kundërshtuar akuzat dhe dënimet e dhëna në Belgjikë. Sipas mbrojtjes, klienti i tij është shpallur i pafajshëm në disa procedime dhe provat e përdorura ndaj tij janë të diskutueshme. Avokati ka ngritur gjithashtu pretendime mbi mënyrën e marrjes së disa deklaratave nga persona të tjerë dhe ka kundërshtuar përdorimin e një pjese të materialeve të komunikimeve të Sky ECC.