TIRANË, 25 Nëntor /ATSH- I. Vata/ -Presidenti i Republikës, Bujar Nishani, mori pjesë sot në Samitin e jashtëzakonshëm të krerëve të Shteteve të vendeve anëtare të Procesit të Brdo-Brijunit, zhvilluar në Zagreb të Kroacisë.
Samiti u thirr nga Presidentët e Kroacisë e Sllovenisë, me synim forcimin e dialogut strategjik mes vendeve të Ballkanit Perëndimor, Shteteve të Bashkuara të Amerikës dhe Bashkimit Evropian, si dhe rikthimin e vëmendjes së Shteteve të Bashkuara në rajonin tonë në këto momentesh sfidash e kërcënimesh.
Të ftuar të veçantë në këtë Samit ishin Zv/Presidenti i Shteteve të Bashkuara të Amerikës, Joseph Biden; Presidenti i Këshillit Evropian, Donald Tusk; si dhe Presidenti i Austrisë, Heinz Fischer. Samiti u fokusua në çështjet e sigurisë dhe luftës ndaj terrorizmit, të krizës së migracionit nga vendet në konflikt, si dhe të rivitalizimit të procesit të zgjerimit të Bashkimit Evropian me vendet e Ballkanit Perëndimor
Presidenti Nishani në fjalën e tij shprehu shqetësimin për zhvillimet ndërkombëtare pas sulmeve terroriste të Parisit dhe i konsideroi ato si kembana të forta alarmi. Gjithashtu, ai theksoi se, për shkak të këtyre zhvillimeve dhe vulnerabilitetit të rajonit të Ballkanit Perëndimor, Bashkimi Evropian dhe Shtetet e Bashkuara të Amerikës duhet të rivlerësojnë prezencën, ndihmën dhe veprimet konkrete në këtë rajon. Ndërsa lidhur me luftën kundër terrorizmit, Nishani u shpreh ndër të tjera se "Shqipëria ka mbështetur dhe është në favor të konkretizimit të iniciativës së vendeve të Ballkanit Perëndimor në luftën kundër terrorizmit, platformë e iniciuar gjatë Presidencës shqiptare të SEECP-së dhe që është parë me interes edhe nga Këshilli i BE-së dhe vendet anëtare në takimin me Këshillin kundër Terrorizmit, më 20 nëntor 2015".
Një tjetër problematike që theksoi Nishani ishte edhe procesi i zgjerimit, duke iu bashkuar konkluzionit të bashkëorganizatorëve të këtij Samiti, për rivitalizimin e procesit të zgjerimit dhe konsiderimin e tij si një proces politik dhe jo thjesht teknik, konkluzion ky që u reflektua edhe në konkluzionet finale të Samitit.
Gjithashtu, Presidenti Nishani zhvilloi biseda të veçanta me Zv/Presidentin e Shteteve të Bashkuara të Amerikës, Biden, me Presidentin e Këshillit Evropian, Tusk, me Presidentin e Austrisë, Fischer, si dhe me homologët e rajonit të Evropës Juglindore, duke ndarë me ta shqetësime dhe vlerësime për situatën në Shqipëri dhe në rajon.
Zv/Presidenti amerikan Biden në fjalën e tij e konsideroi Shqipërinë një lider në rajon për kundërterroriznin. Në fund të Samitit krerët e shteteve të procesit të Brdo-Brijunit, së bashku me të ftuarit e posacëm, miratuan konkluzionet përkatëse. /a.ke/
