Rrugët bosh, pa njerëz, pa makina, pa zhurmë, pa pluhur. Qyteti ende s”i ka hapur sytë. Trafiku i pamëshirshëm dhe rrugëtimi i njerëzve në vërdallosje, sikur ka harruar të dalë. Një panoramë e paqtë parajse, që befas shndërrohet në një larmi gumëzhimash njerëzore dhe gjithçka futet në ciklin e pështjellimit total.
Për pak minuta gjithçka ndryshon, qyteti, njerëzit, jeta. Për pak kohë imagjinata jonë e çon Tiranën në krahasimin e vendeve në perëndim, në fillim qetësi, pastërti, rregull, një jetë e qetë, ndërsa po brenda pak minutash gjithçka prishet në imagjinatë dhe qyteti merr pamjen tjetër. Ndryshimi bëhet aq shpejt, sa nuk je gati ta perceptosh realitetin e ri. Qyteti kthehet në një rrugëtim djajsh. Njerëz që ecin nga të gjitha drejtimet, pa ditur nga janë nisur dhe ku do të shkojnë, makinat u bien burive pa qenë nevoja, emigrantë me makina 20 mijë euro-she që ngrenë zërin e kasetofonëve me këngë të shekujve të kaluar, të rinj që mbushin lokalet pa fund, lypës, kalimtarë të rastit, të thjeshtë apo edhe nga ata që vërdallisen kot.
Jeta e qytetit humbet menjëherë ekuilibrin, ngjeshën turmat, njerëzit dalin në xhiro edhe pse s”kanë punë. “Vritet” qetësia , tashmë metropoli “pushtohet” nga ata që i japin jetë edhe pse shpesh herë në mënyrë ta gabuar. Ndryshimi i madh kapërdin Tiranën. Në krye të revolucionit s”ka revolucionarë, por turma njerëzish që “ia marrin jetën” qytetit dhe e kthejnë në një kaos total, ku as më i zgjuari nuk ia gjen dot fillin. Qetësia publike fshihet me revoltën e fshehur të turmave, që vërdallisen pa kuptim. Jeta e qytetit konceptohet shumë ngushtë, shëtitje në mes të pluhurit, kafene dhe pastaj vjen mbyllja e tmerrshme në shtëpi, duke privuar veten nga jeta e vërtetë.
Qytetarët vrasin kohën në mënyrën më të shëmtuar të mundshme. Një popull i tërë që s”ka pikësynime dhe vërtiten të gjithë në sheshe apo rrugë kryesore, duke e mbytur metropolin. Një shoqëri e tërë e vetëkeqformatuar, gjithkush mundohet të tregohet i emancipuar apo i zhvilluar pasi jeton në qytet, pi kafen në bllok dhe sillet vërdallë gjithë ditën për t”u “dashuruar” me qytetin, dhe për t”i treguar se jam edhe unë.
Tirana vuan kulturën e fundjavës. E gjitha bota në fundjavë ndryshon ambient, duke preferuar vendet me ajër të pastër, qetësuese dhe relaksuese, ndërsa kultura e kalimit të një fundjave në Shqipëri ngushtohet në maksimumin e mundshëm. Një kafe apo drekë me gjithë farefisin pa shijuar dot një intimitet familjar, një shëtitje në rrugët me pluhur dhe pastaj në shtëpi. Vlerat e dobëta dhe mos integrimi në një shoqëri tjetër e qytetarëve të rinj, shndërrohet në vetë shkatërrim dhe humbje të papritur të identitetit, qetësisë dhe lumturisë së qytetit fatkeq, që për një moment ngjante me perëndimin