OKB voton për të miratuar hartën e re të botës
5 Shtator 2026
Asambleja e Përgjithshme e Kombeve të Bashkuara ka miratuar një rezolutë që nxit përdorimin e një harte të botës që pasqyron më saktë përmasat reale të kontinenteve, veçanërisht të Afrikës.
Rezoluta “Correct the Map”, e udhëhequr nga Togo dhe e mbështetur nga Bashkimi Afrikan, mori 164 vota pro, ndërsa vetëm Shtetet e Bashkuara votuan kundër. Gjashtë vende abstenuan.
Nisma promovon përdorimin e projeksionit “Equal Earth”, të krijuar në vitin 2018, si alternativë ndaj hartës së Mercatorit, e cila është përdorur gjerësisht që prej shekullit të 16-të. Rezoluta nuk është detyruese dhe nuk e ndalon përdorimin e hartës së Mercatorit, veçanërisht për navigimin detar dhe ajror.
Problemi kryesor me projeksionin e Mercatorit lidhet me shtrembërimin e përmasave të sipërfaqeve tokësore. Vendet dhe kontinentet pranë poleve shfaqen shumë më të mëdha se përmasat e tyre reale, ndërsa zonat pranë ekuatorit duken më të vogla.
Një prej shembujve më të njohur është Groenlanda, e cila në hartën e Mercatorit duket thuajse sa Afrika, ndërsa në realitet Afrika është rreth 14 herë më e madhe.
Ministri i Jashtëm i Togos, Robert Dussey, e ka mbrojtur nismën me argumentin se mënyra se si paraqitet bota në harta ndikon në perceptimin që njerëzit krijojnë për kontinente dhe vende të ndryshme.
“Një botë e drejtë fillon me një hartë të drejtë”, është shprehur Dussey përpara votimit.
Edhe Franca dhe Mbretëria e Bashkuar votuan pro rezolutës. Franca ka shprehur mbështetje për ndryshimin e mënyrës së paraqitjes së botës në hartat institucionale.
Nga ana tjetër, Shtetet e Bashkuara ishin i vetmi vend që votoi kundër. Përfaqësuesja amerikane në OKB e kritikoi rezolutën, duke argumentuar se ajo largon vëmendjen nga çështjet kryesore që lidhen me paqen, prosperitetin dhe marrëdhëniet ndërkombëtare.
Vendimi i OKB-së pritet të ndikojë gradualisht në materialet mësimore, hartat institucionale dhe mënyrën se si paraqitet bota në teknologji dhe platforma të ndryshme, megjithëse përdorimi i hartës së Mercatorit nuk është ndaluar.
Në thelb, ndryshimi nuk e “ndryshon” hartën e Tokës, por mënyrën se si ajo projektohet në një sipërfaqe dydimensionale, duke synuar një paraqitje më të saktë të madhësisë relative të kontinenteve.