![](https://i0.wp.com/www.shqiperia.com/blog/wp-content/uploads/2024/02/416686301_931041528281108_4660227737572482604_n-2-1333x1000-1.jpg?fit=1300%2C975&ssl=1)
Në Prishtinë përkujtohet jeta dhe vepra e albanologut kroat, Milan Sufflay
21 Shkurt 2024
Instituti për Siguri, Media dhe Arsim ka ndezur qirinj në sheshin Nënë Tereza në Prishtinë, në nderim të historianit e albanologut kroat, Milan Sufflay (1879-1931). Ky përkujtim u bë në përvjetorin e vdekjes së tij nga regjimi i Mbretërisë së Jugosllavisë, raporton Ekonomia Online.
Agim Rexhepi nga kjo organizatë tha se Milan Sufflay është një personalitet shumë i fuqishëm kroat, diplomat, shkencëtar, një filozof, një njeri që ka punuar shumë për interesat nacionale.
Ai theksoi se Sufflay, si themelues i albanologjisë së shqiptarëve, ka punuar shumë edhe për çështjen shqiptare.
‘’Në atë kohë kur kombi jonë ka qenë me numër të vogël të njerëzve te shkolluar ky ka qenë doktor i shkencës dhe ka bërë shumë për ne. Ky është qëllimi dhe arsyeja pse ne e zhvillojmë sot këtë dhe e dyta është vdekja e këtij personaliteti. Sot është viti i 93-të i vdekjes së tij. Këtë personalitet e kanë vrarë serbët, e kane vrarë sepse ishte një patriot i madh dhe themelues i albanologjisë së kombit shqiptar. E veçanta e këtij aktiviteti është që të gjitha këto fotografi do t’ua dhurojmë shkollave në nivel të Kosovës’’, ka thënë ai.
Sufflay ishte dekoruar nga presidentja e Kosovës Vjosa Osmani me medalje presidenciale dhe në Shqipëri me çmimin “Naim Frashëri”.
![](https://i0.wp.com/ekonomiaonline.com/wp-content/uploads/2024/02/426035947_421649116951722_7011808446195555386_n-1333x1000.jpg?resize=780%2C585&ssl=1)