31 Gusht 2025

Izraeli po shqyrton seriozisht mundësinë e aneksimit të pjesëve të pushtuara të Bregut Perëndimor, si kundërpërgjigje ndaj planit të disa vendeve si Franca që pritet të njohin zyrtarisht shtetin palestinez gjatë Asamblesë së Përgjithshme të OKB-së në muajin shtator. Lajmi është raportuar nga agjencia Reuters, që citon tre zyrtarë izraelitë të paidentifikuar.

Çështja pritet të diskutohet gjerësisht të dielën në mbledhjen e kabinetit të sigurisë së Izraelit, që do të zhvillohet me fokus të veçantë mbi luftën në Rripin e Gazës.

Sipas burimeve, ende nuk është përcaktuar se si do të zbatohej ndonjë skenar i mundshëm aneksimi — nëse do të përfshinte vetëm disa nga vendbanimet izraelite në Bregun Perëndimor, apo zona të caktuara si Lugina e Jordanit. Po ashtu, mbetet e paqartë nëse nga diskutimet do të dalin hapa konkretë, të cilët do të kërkonin një proces të gjatë ligjor dhe politik.

Megjithatë, çdo përpjekje për të aneksuar territore të Bregut Perëndimor pritet të shkaktojë reagime të ashpra nga palestinezët, të cilët e konsiderojnë zonën si pjesë kyçe të një shteti të ardhshëm palestinez. Reagime priten edhe nga vendet arabe dhe nga shumë vende perëndimore.

Qëndrimi i presidentit amerikan Donald Trump për këtë çështje ende nuk është bërë i qartë, ndërsa zyrtarë të qeverisë izraelite nuk kanë dhënë përgjigje në lidhje me këtë mundësi. Gjithashtu, nuk është bërë e ditur nëse ky diskutim është trajtuar gjatë vizitës së fundit të ministrit të Jashtëm izraelit, Gideon Saar, në Uashington.

Kujtojmë se kryeministri Benjamin Netanjahu në të kaluarën ishte zotuar se do të aneksonte vendbanimet hebraike dhe Luginën e Jordanit, por planet u pezulluan në vitin 2020 për të mundësuar normalizimin e marrëdhënieve me Emiratet e Bashkuara Arabe dhe Bahreinin, përmes Marrëveshjeve të Abrahamit të ndërmjetësuara nga administrata Trump.

Ndërkohë, presidenti palestinez Mahmud Abbas nuk ka reaguar ende për çështjen. Por të premten, SHBA deklaroi se nuk do t’i lejojë Abbasit të marrë pjesë në takimin e liderëve botërorë në OKB, ku disa aleatë të Uashingtonit — përfshirë Francën, Britaninë, Australinë dhe Kanadanë — synojnë të shpallin zyrtarisht njohjen e shtetit palestinez, një hap që ka zemëruar qeverinë izraelite.

Në këtë kontekst, vlen të përmendet edhe një vendim i Gjykatës Ndërkombëtare të Drejtësisë të OKB-së në vitin 2024, e cila e cilësoi pushtimin izraelit të Bregut Perëndimor dhe ndërtimin e vendbanimeve hebraike në atë zonë si të paligjshëm, duke kërkuar tërheqje të menjëhershme.

Pavarësisht kësaj, Izraeli vazhdon të pretendojë se këto janë “territore të diskutueshme” dhe jo të pushtuara, një qëndrim që nuk mbështetet nga shumica e bashkësisë ndërkombëtare dhe nga vetë OKB-ja.

Ndërkohë, brenda koalicionit qeverisës të Netanjahut ka zëra të vazhdueshëm që kërkojnë aneksimin zyrtar të pjesëve të Bregut Perëndimor, duke u mbështetur në lidhje biblike dhe historike që, sipas tyre, Izraeli ka me këtë tokë.