Shqiperia ne bordin drejtues te Federates Boterore te personave qe nuk degjojne

Për herë të parë Shqipëria do të ketë përfaqësuesin e vet në bordin drejtues të Federatës Botërore të personave që nuk dëgjojnë (WFD). Florjan Rojba u përzgjodh si një nga nëntë anëtarët e organizmit drejtues gjatë Asamblesë së 19-të të Përgjithshme të WFD-së që u mbajt në Stamboll më 26-27 korrik.

Rojba është koordinator i përgjithshëm i Shoqatës Shqiptare të personave që nuk dëgjojnë (ANAD).

Federata Botërore e personave që nuk dëgjojnë është një organizatë ndërkombëtare joqeveritare që përfaqëson rreth 70 persona me këtë problem në mbarë botën. Sipas vlerësimeve, më shumë se 80% e këtyre njerëzve vijnë nga vende në zhvillim, ku autoritetet janë pak të njohura me nevojat e tyre.

E njohur nga Organizata e Kombeve të Bashkuara, WFD-ja bashkëpunon ngushtë me OKB-në për mbrojtjen dhe promovimin e të drejtave të këtyre personave në përputhje me kartën e Kombeve të Bashkuara dhe Deklaratën Universale të të Drejtave të Njeriut.

Kur është e nevojshme, WFD-ja ndërmerr masa administrative apo ligjore për të siguruar që personat që nuk dëgjojnë të kenë mundësi të përdorin gjuhën e tyre të shenjave si dhe të organizojnë veprimtari kulturore e jo vetëm. Personat me këtë problem në vendet në zhvillim janë në fokus të veçantë të organizatës, ku përfshihen e drejta për të përdorur gjuhën e shenjave dhe mundësi të barabarta në të gjitha fushat e jetës, përfshirë arsimimin dhe informimin.