Një burrë nga Tajvani mbijetoi 60 orë në det të trazuar, megjithëse nuk di të notojë, bëhet e ditur nga media vendëse. Tseng Lien-Fa, 42 vjeç, ishte në një plazh kur një dallgë e madhe e rrëmbeu dhe e hodhi në det. Ai arriti të dalë pas 60 orësh në një plazh tjetër 75 kilometra më larg.
Tseng u mbajt pas një cope druri për të mos u fundosur para se të gjendej nga punëtorët e shpëtimit në plazh të dielën. Shërbimi i urgjencës tha se ai ishte dehidratuar paksa dhe pati disa acarime në krahë nga uji i kripur.
Një mjek tha se mbijetesa e tij ishte “një mrekulli” për shkak se ai mbeti pa ushqim apo ujë për më shumë se 60 orë. I mbijetuari shtoi se pati shpresuar që të shpëtohej nga ndonjë anije por arriti në fund të shtyjë me këmbë drejt bregut kur pa dritat e një autostrade. Bashkëshortja e tij pati lajmëruar policinë kur ai nuk u kthye në shtëpi. Ai ishte në breg duke kapur ngjala të vogla për t’i shitur në tregun lokal.