Grupi “Fanfara Tirana” do të marrë pjesë në festivalin “Quarrata Folk Festival” në Quarrata të Italisë, në datën 26 qershor, ora 19:30. Ky grup i njohur për turnetë në mbarë botën do të shoqërohet kësaj here dhe nga instrumentistët Redi Hasa dhe Maria Mazzotta (Salento). Ata me muzikën e tyre në violonçel përfaqësojnë Mesdheun dhe Ballkanin. Ka disa vjet që ata interpretojnë mes zërit dhe violonçelit, dialog mesdhetar dhe ballkanik. Maria Mazzotta, me zërin e saj ka trashëguar brez pas brezi këtë muzikë, duke e sjellë nga Jugu i Italisë. Ndërsa melodia ritmike e violonçelit të Redi Hasës të kujton shpirtin ballkanik dhe hapësirën e Italisë Jugore, ndërsa rikrijojnë një muzikë të veçantë nga kontakti i vrullshëm i hulumtimit të tyre ekspresiv.
Muzika e grupit “Fanfara Tirana” frymëzohet nga folklori dhe sidomos nga muzika urbane shqiptare, që është riaranxhuar për instrumente frymore-bandistike. Folklor, xhaz dhe elemente “funky” dhe “reggae” ndërthuren së bashku në interpretimin e tyre. Melankolia e polifonisë dhe kabasë së Jugut vjen në mënyrë harmonike nëpërmjet tingujve të kësaj muzike
Albumi i tyre i fundit “Kabatronics” pati një jehonë ndërkombëtare me mbi 100 recensione me 4 e 5 yje nga media ndërkombëtare. Pjesëmarrja e tyre do të jetë dhe në skena të tjera ndërkombëtare si: Roskilde, Sziget, Mundial, Carnevale di Venezia, Roma Incontra il Mondo, Womex, Womad, Time in Jazz, Pohoda, Dranouter, Pirineo Sur, Pohoda etj. Nga 30 shtatori më 7 tetor 2015, do të jetë prezent në festivalet më të mëdha të vendit në Shanghai, Beijing, Foshan, Wuhan, Chongqing dhe Shenyang.