5 Shtator 2026

Kreu i Partisë Demokratike, Sali Berisha, ka ngritur akuza të reja lidhur me SHISH-in, duke deklaruar se institucioni drejtohej në praktikë nga Ergys Agasi, pretendim të cilin tha se e kishte denoncuar prej vitesh. “Struktura e SHISH drejtohej nga Ergys Agasi, gjë të cilën unë e kam denoncuar vite më parë”, deklaroi Berisha. Ai iu referua edhe një debati televiziv, duke argumentuar se pretendimet e tij për situatën brenda Shërbimit Informativ kishin qenë të njohura më herët.

Berisha pretendoi se SHISH, nën drejtimin që ai ia atribuon Agasit, ka survejuar dhe regjistruar përfaqësues të opozitës dhe kundërshtarë, por edhe ministra e deputetë të mazhorancës. Kreu demokrat pretendoi më tej se përgjimet kanë përfshirë edhe ambasada dhe shërbime të huaja që veprojnë në Shqipëri. Berisha nuk paraqiti në deklaratën e cituar prova publike për këto pretendime specifike. Raportimet e fundit kanë dokumentuar ndërkohë se hetimet ndaj ish-drejtueses së SHISH, Vlora Hyseni, kanë përfshirë komunikimet e saj me Agasin dhe çështje që lidhen me informacione të klasifikuara. Sipas Berishës, nëse këto pretendime provohen, veprime të tilla do të përbënin shkelje të detyrimeve ndërkombëtare të Shqipërisë.

Ai pretendoi gjithashtu se përgjimi i përfaqësive diplomatike dhe shërbimeve të vendeve partnere do të cenonte sigurinë e tyre. Kreu i PD-së u shpreh se pret që pretendimet e ngritura prej tij të dalin në dritë në vijim, duke deklaruar: “Por koha do t’i provojë këto dhe jo vonë.” “Struktura e SHISH drejtohej nga Ergys Agasi, gjë të cilën unë e kam denoncuar vite më parë. Në fakt dëgjova një natë një debat televiziv dhe një nga gazetarët i tha kolegut të vet: “po ne i dinim këto gjëra”. Në fakt, ato ishin të ditura dhe ne i kishim denoncuar ato me dhjetëra herë. Kështu që shërbimi informativ i drejtuar nga Ergys Agasi, jo vetëm që ka regjistruar, survejuar, opozitën dhe kundërshtarët e tij, por ka të dhëna të plota që ka përgjuar zyrtarë, ministra, deputetë të partisë në pushtet, partisë së krimit në pushtet.

Dhe po kaq të plota që ka përgjuar të gjitha ambasadat dhe shërbimet e huaja në Shqipëri. Duke shkelmuar në këtë mënyrë Konventën e Vjenës, shkelmuar traktatet ndërkombëtare në të cilat Shqipëria është palë. Dhe këto do të dalin. I kemi denoncuar në kohë, i denoncojmë prapë sot, sepse të përgjosh shërbimet diplomatike në Shqipëri, lëvizjet e të huajve në një vend aleat të NATO-s, e bën vetëm për qëllime armiqësore ndaj këtyre vendeve, duke kërcënuar sigurinë e tyre, duke kërcënuar sigurinë e personave të përgjuar. Por koha do t’i provojë këto dhe jo vonë”, theksoi

Berisha këtë fundjavë në rrjetet sociale.

“Vila e kuqe” në qendër të akuzave për takimet Rama-Hyseni-Agasi

Ndërkohë kreu i Partisë Demokratike, Sali Berisha ka deklaruar se kryeministri Edi Rama, Vlora Hyseni dhe Ergys Agasi janë takuar së bashku në vilën e biznesmenit. Sipas Berishës, takimet mes Ramës, Hysenit dhe Agasit janë zhvilluar në vilën e këtij të fundit. “Rama, Vlora Hyseni dhe Ergys Agasi janë takuar të tre së bashku tek vila e kuqe. Takimet me Ergysin dhe Vlora Hysenin i kanë bërë në vilën e Ergys Agasit, në të cilën Edi Rama, sipas dëshmitarëve, ka qenë arkitekt i interierit të saj, i brendësisë së saj”, tha Berisha. Ai shtoi se ka pasur edhe pretendime se vila mund të jetë në fakt e lidhur me kryeministrin, por theksoi se nuk mund ta konfirmojë këtë.

Berisha deklaroi gjithashtu se ka marrë nga persona që i cilësoi si “qytetarë dixhitalë” një fotografi, e cila, sipas tij, tregon Vlora Hysenin duke hyrë në banesën e Ergys Agasit. “Dua ta them këtu, qytetarë dixhitalë më kanë dërguar mua fotografinë e Vlorë Hysenit duke hyrë në banesën e Ergys Agasit, në vilën e tij. Nuk e kam publikuar sepse nuk doja të hyja në çështje personale”, u shpreh kreu i PD-së. Në vijim, kreu i PD-së bëri edhe akuza të tjera ndaj Agasit, duke pretenduar se ai përdorte kërcënime me vrasje ndaj personave të ndryshëm. “Ergysi në telefonat e tij kërcënonte me vrasje. U thoshte: ‘Kërcet plumbi, ty të merret koka’”, nënvizoi Berisha.

Reagon Prençi

Nga ana tjetër, ish-drejtuesi i Policisë, Shemsi Prençi, ka ngritur akuza të forta për mënyrën se si ka funksionuar Shërbimi Informativ i Shtetit nën drejtimin e Vlora Hysenit. Ai deklaroi në një media këtë fundjavë se informacione sensitive kanë rrjedhur nga institucioni dhe kanë përfunduar në duart e personave të lidhur me krimin. Prençi u shpreh se kishte marrë informacione prej kohësh se drejtimi i SHISH ishte “marrë peng nga krimi i organizuar”.

Ai e lidhi situatën edhe me zhvillimet e fundit që kanë përfshirë ish-drejtoreshën Vlora Hyseni dhe biznesmenin Ergys Agasi. “E kisha si informacion se koka e Shërbimit Informativ të Shtetit ishte marrë peng nga krimi i organizuar. Vendosja në krye të Portit të Durrësit, me një person nga Kosova, ishte që qeveria ta përdorte si të donte. Nuk dua të aludoj se për sa dëm i është bërë SHISH, pasi atë analizë do të jetë e vështirë ta bëjë edhe një komision parlamentar”, tha ai. Prençi u shpreh se shqetësimet për rrjedhjen e informacionit i janë përcjellë edhe nga oficerë të SHISH-it me të cilët ka pasur kontakte. Sipas tij, brenda strukturës ishte krijuar perceptimi se informacionet e përcjella mund të përfundonin jashtë institucionit.

“Nga kontaktet që kam pasur edhe me oficerë të SHISH-it, më kanë thënë që tashmë në SHISH nuk mund të dërgosh informacion, pasi rrjedhin dhe shkojnë në adresë të krimit. Për çudi, njerëzit rëndom, që thonë se nuk kemi shërbim, këtë e tha dhe kryeministri, e ka dakordësuar, por në formë elokuente”, vijoi ai. Ish-drejtuesi i Policisë u ndal më tej te mënyra se si informacionet e SHISH i janë përcjellë kryeministrit. Ai kritikoi delegimin e marrjes së informacionit dhe ngriti pikëpyetje mbi përgjegjësinë institucionale.

“Ai tha se s’ka pasur informacione, se ia ka deleguar drejtoreshës së Kabinetit. Kryeministri i delegon informacionet sekrete të SHISH te drejtori i Kabinetit, kur ligji thotë: kreu i SHISH raporton te kryeministri apo presidenti. Kush është kryeministri që delegon informacionet sekrete të SHISH te roja e derës? Ai do që të largojë përgjegjësinë”, tha Prençi. Ai kritikoi gjithashtu faktin që SHISH nuk kishte një zëvendësdrejtues, duke ia faturuar përgjegjësinë politike kryeministrit. Sipas tij, mënyra se si ishte organizuar drejtimi i institucionit kishte ndikuar në funksionimin e tij. “Me dakordësinë e tij SHISH nuk ka zëvendës, që urdhrat të jepen në një qark të shkurtër.

Vlora Hyseni solli degradimin e SHISH. Në momentin kur informacioni ikën nga Nisida dhe vjen te Shemsiu, pushtetin s’e ke më ti, por te grupi i strukturuar kriminal”, u shpreh ai. Një pjesë e fortë e deklaratave të Prençit lidhet me marrëdhënien mes ish-drejtoreshës së SHISH dhe Ergys Agasit. Ai thekson se afrimi i Agasit me Hysenin nuk ka qenë rastësor, por ka pasur si qëllim sigurimin e informacionit mbi atë që institucionet shtetërore dinin për të dhe personat e lidhur me të. “Kalimi, qasja e Gys Agasit te Vlora Hyseni, nuk është e paqëllimtë. Ishte qasje strategjike. Për të kuptuar se merr informacione se sa di shteti për bëmat e mia dhe grupit tim. Qasja ishte strategjike përmes fuqisë që i ka dhënë kryeministri”, deklaroi Prençi.

Sipas Prençit, zotërimi i informacionit të klasifikuar mund të përdoret si instrument pushteti, veçanërisht kur ai përfundon jashtë strukturave që duhet ta administrojnë. “Ai nuk ka abuzuar, ia kanë dhënë këtë fuqi. Marrja e informacioneve nga Agasi dhe të tjerët, përdorimi i tyre dhe për t’u mbrojtur është pushtet. Tani nuk punohet më për Shërbim, pasi është në interes të grupeve kriminale. S’kam më shërbim!”, përfundoi Prençi.