19 shtator 2026

Izraeli pritet t’i kërkojë Shteteve të Bashkuara pajisje dhe kapacitete shtesë ushtarake, në kuadër të një “kompensimi” pas miratimit nga Washingtoni të shitjes së avionëve luftarakë F-35 për Arabinë Saudite.

Sipas medias izraelite Walla, Tel Avivi synon të kërkojë sisteme armësh që administrata e presidentit amerikan Donald Trump kishte refuzuar më herët t’i miratonte.Kërkesat e Izraelit pritet të shkojnë përtej avionëve të avancuar luftarakë dhe teknologjisë stealth. Sipas raportit, në fokus janë edhe armët me bazë në hapësirë, si dhe zhvillimi dhe prodhimi i sistemeve të reja për interceptimin e kërcënimeve.

Në listën e pajisjeve që mund të kërkohen përfshihen edhe municione për depërtimin e bunkerëve dhe sisteme nëntokësore të afta të operojnë në thellësi të mëdha nën formacione shkëmbore.Kjo kërkesë lidhet me shqetësimet e Izraelit pas vendimit amerikan për shitjen e avionëve F-35 Arabisë Saudite. Të enjten, Departamenti amerikan i Shtetit miratoi një shitje të mundshme në vlerën 24.3 miliardë dollarë, që përfshin 48 avionë F-35. Marrëveshja duhet ende të kalojë procesin e shqyrtimit në Kongresin amerikan.

Paketa e propozuar përfshin gjithashtu 49 motorë Pratt & Whitney F135-PW-100, pajisje për komunikime të sigurta, sisteme për luftën elektronike, trajnime dhe mbështetje logjistike.

Nëse marrëveshja finalizohet, Arabia Saudite do të bëhej vendi i parë arab që operon avionë F-35, ndërsa Izraeli është aktualisht i vetmi shtet në Lindjen e Mesme që i përdor këto avionë.

Çështja vjen në një moment kur marrëdhëniet mes Izraelit dhe Arabisë Saudite mbeten të lidhura me çështjen palestineze. Riadi ka deklaruar se normalizimi i marrëdhënieve me Izraelin lidhet me krijimin e një shteti palestinez përgjatë kufijve të vitit 1967, një qëndrim që Izraeli e kundërshton.