Në premierën e filmit në kinemanë “ Millenium”, në Tiranë, pikërisht në prag të 100-vjetorit të Pavarësisë, Anxhelina do të përmendte shumë e emocionuar faktin e fotografisë së Bandës “Vatra” të Amerikës, ku gjyshi i saj Kristaq Koço dhe babai i Ilias, Petro Terpini, do të ishin çuditërisht në të njëjtin pozicion, në rrjeshtin e dytë të fotos historike, njëri majtas e tjetri djathtas, me një shprehje djaloshare atdhedashurie. Pra në arkivin familjar të dy kineastët e kishin të ruajtur me kujdes foton që tregonte si u kthyen nga Amerika për Luftën e Vlorës të 1920-ës, djemtë vullnetarë shqiptarë, të dërguar me mision patriotik nga “Vatra” e Fan S. Nolit dhe e Faik Konicës. Duke e pyetur Anxhelinën për vështirësitë e këtij filmi ajo do të përgjigjej e menduar se vështirësia e parë ishte ana financiare.
Por kjo u kapërcye me kurajo, duke u nisur fillimisht në Amerikë si artiste patriote, ”pa asnjë dyshkë në xhep”, siç do thoshim ne nga Korça, pastaj me mbështetjen e organizmave përkatëse. Dokumentari i xhiruar nga profesionistë u realizua me një dashuri të madhe edhe nga ndihma konkrete e shqiptarëve të sotëm të Amerikës, që e kanë në frymëmarrjen e tyre dashurinë për emrin e mirë të Shqipërisë e shqiptarëve. Filmi ngjizet me dokumenta, xhirime detajesh historike, që ngrihen në simbol, me intervista sinjifikative aq të bukura, për të dhënë tablonë e tërë të një historie dhe një përpjekje të madhe.
Në film del “Vatra”, si institucion i shenjtë për shqiptarët që po i dilnin për zot atdheut në vendin më demokratik në botë, në Amerikën e ëndrrave e shpresave të mëdha. Me gjuhë shprehëse kinematografike në dokumentar disa herë theksohet mbledhja e ndihmave për Shqipërinë, në vite të vështira të fillimit të shekullit të kaluar, kur rrezikohej shumë pavarësia e posashpallur e shtetit shqiptar. “Vatra” shërbeu si qeveri në mërgim për të mbështetur delegatët në Europë, që mbronin çështjen shqiptare në konferencat ndërkombetare, për të mbajtur hapur një gazetë historike, zëdhenësen e saj ”Diellin”, botimet, daljen e revistave e librave shqip, mbështetjen për autoqefalinë e Kishës Shqiptare, mbështetjen me hua kombëtare për qeverinë e Lushnjës etj. Nga biseda me Anxhelinën kupton se asnjë gjë nuk vjen papritur.
Ajo më tregon se në universitet dikur, si temë diplome ka mbrojtur temën:”Mendimi përparimtar i viteve ‘30 –të”. Pikërisht në faqet e gazetave të këtyre viteve ajo ka lexuar artikuj e shkrime të mendimtarëve të mëdhenj të kombit siç janë Konica e Noli. Veç tregimeve plot ngjyrë të gjyshit të saj për Amerikën e Luftën e Vlorës, veçanërisht shkrimet e gazetës “Dielli”, e kane ushqyer mençërisht përgjithë jetën. Gjatë punës në Kinostudio ka hulumtuar në vazhdimësi për tema historike duke realizuar filma për gjenezën e shqiptarëve, për revolucionin e 1924-ës, për profesor doktor Aleksandër Xhuvanin, për Luftën e Vlorës etj. Materialet dokumentare të Arkivit të Filmit, të Arkivit Shtetëror, të Bibliotekës Kombëtare, shfletimi i librave të ndryshëm me temë pavarësinë e Shipërisë dhe sidomos libri i botuar posaçërisht për Federatën “Vatra” nga Prof. Dr. Beqir Meta, ishin mbështetja kryesore për shkrimin e skenarit të këtij filmi të rëndësishëm.