Historia shqiptare do të luhet nga aktorët tanë, madje do të ketë edhe një asistent regjisor shqiptar. Përmeti thotë se ideja për të realizuar një film me regjisorin serb ka lindur 2 vjet e gjysmë më parë, ndërsa për Paskaljeviçin, dëshira është shumë më e hershme, qysh në çmimin e marrë në Venecia në vitin 1999, me filmin “Powder Keg”, ku publikisht u shpreh se donte të bënte një film në Shqipëri. “Dhe ky film është një sfidë personale e Paskaljeviçit, pasi pikërisht për këtë ai është goditur nga nacionalistët serbë, të cilët e kanë quajtur tradhtar”, - thotë Përmeti. Përmes postës elektronike regjisori është njoftuar për kalimin e projektit dhe është shprehur tepër i kënaqur, që po realizohet një nga ambicjet e tij profesionale. Filmi do të jetë tërësisht i pastër nga paragjykimet raciale e nacionaliste. Skenaristi thotë se filmi është human dhe pa ngjyrime politike, madje kjo është pikërisht ajo që duan të mbajnë sa më larg.
As shpallja e pavarësisë së Kosovës nuk ndryshon asgjë në motivin që përshkon filmin, por as në komunikimin mes artistëve. “Besoj se edhe në Kosovë ky film do të pritet mjaft mirë e do të shijohet si një vepër arti, sepse si në Serbi, Kosovë, Shqipëri, apo vende të tjera të Ballkanit, përjetojmë të njëjtat ndjesi. Ndajmë të njëjtat halle, kemi të njëjtën mënyrë jetese dhe presim të na pranojnë në Evropë”. Ndaj dhe në qendër vendosen dy familje të thjeshta. Xhirimet e pjesës shqiptare do të zhvillohen në një të tretën e tyre në zona rurale përreth Tiranës e pjesa serbe në një fshat. Me miratimin në QKK, projekti hyn në një fazë tjetër, atë të përpilimit të kontratave e përzgjedhjes së kastit të aktorëve. Nga QKK ky projekt përfiton një shumë prej 30 milionë lekësh të reja, që do të përdoren për zhvillimin e pjesës shqiptare, ndërsa pjesa tjetër do të mbulohet nga ajo serbe. Përmeti flet edhe për partnerë të sigurtë gjermanë, francezë, zviceranë e italianë. Momentalisht regjisori serb ndodhet në Amerikë, ku po kryen bisedime për një film me aktorin Pierce Brosnan, që do të xhirohet në Irlandë.
Alma Mile Gazeta Shekulli