Trajneri i Kombëtares shqiptare të futbollit, Xhani De Biazi, vijon të jetë në fokus të mediave italiane si një kandidaturë e mundshme për të marrë postin e 'axurrëve' pas largimit të Antonio Kontes në mbyllje të Europianit.
Në një intervistë të fundit të dhënë për "Mediaset", tekniku tha se do të ishte një nder për të nëse do t'i ofrohej kjo mundësi, ndërsa shtoi se aktualisht është i përqendruar me kuqezinjtë për finalet e Europianit.
"Zenga tha se do të jem trajneri i ri i Italisë? Shpresojmë që mos të jetë si në politikë, kur një emër i lançuar shpesh kohë përpara, më pas digjet. Do të ishte një nder.
Kush nuk do ta kishte ambicie të bëhej trajner i Italisë, katër herë kampione bote? Por tani jam i përqendruar në Europian me Shqipërinë time, më pas...",-ka thënë De Biazi, duke i lënë dyert për postin e trajnerit.
Tekniku vlerësoi edhe suksesin e arritur nga Klaudio Raneri në Angli me fitimin e titullit kampion në Premier Ligë.
De Biazi ritheksoi edhe njëherë miqësinë që ka me Ranierin. Ai tha se flet çdo javë më të dhe e ka ndjekur nga afër ecurinë e skuadrës së tij.
Trajneri pranoi edhe krahasimin e Leiçesterit me Shqipërinë, për sukseset e arritura në Premier Ligë dhe me kualifikimin e kuqezinjvë ne "Euro 2016".