15 Gusht 2025

Nëse muret e shtëpisë së Theresa dhe Stuart Ellis mund të flisnin, ato do të kumbonin nga tingujt e tabelave të shumëzimit, gërvishtjet e shkumës në dërrasa dhe koncertet pa melodi të këngëve të Krishtlindjes.

Çifti ra në dashuri me sharmin e një shkolle fillore viktoriane në Northamptonshire dhe kaluan gati një vit duke jetuar në një karavan, ndërkohë që e transformuan ndërtesën në një shtëpi me tre dhoma gjumi, tre banjo dhe një sallon të madh me tavan të dyfishtë. Ata shpenzuan rreth 350,000 £ për ta përshtatur, duke përfituar një fitim në letër prej më shumë se 300,000 £ për një vit punë të palodhur.

“Fillimisht kishim ndërmend të zvogëlonim shtëpinë, por kur gjetëm shkollën, u dashuruam me të,” thotë Stuart, 67 vjeç, një projektues arkitekturash që gjithashtu drejton një kompani ndërtimi.

Ai dhe Theresa, 65 vjeç, që punon në biznesin familjar, jetonin më parë në fshatin Wootton, pranë Northamptonit, në një shtëpi moderne që Stuart kishte ndërtuar vetë. Tre fëmijët e tyre ishin larguar prej kohësh dhe kishin shtatë nipër e mbesa.

Gjatë kërkimit për shtëpi, ata zbuluan një ish-shkollë të ndërtuar në vitin 1874 në fshatin Greens Norton, rreth 16 kilometra larg, që shitej bashkë me një vilë me dy dhoma gjumi, ku kishin jetuar dikur drejtorët e shkollës.

Pas mbylljes në vitet ’60, shkolla ishte kthyer në qendër komunitare dhe kishte qëndruar bosh për disa vite. Çifti pranoi të paguante 485,000 £ për pronën në vitin 2021. Ata shiten shtëpinë e tyre dhe blenë një karavan, ku jetuan për një vit.

Me kalimin e kohës, u lidhen gjithnjë e më shumë me shkollën – me dritaret e harkuara dhe hapësirën e lartë – dhe ndryshuan planet: në vend që të jetonin në vilë dhe të shisnin shkollën, bënë të kundërtën. Shitën vilën për 300,000 £ dhe nisën transformimin e shkollës.

“Pjesa e jashtme duket njësoj si në vitin 1874”

Stuart hartoi vetë planet e reja të shtëpisë: kuzhinë, dhomë ngrënieje dhe sallon të hapur në vendin ku dikur fëmijët recitonin këngë çerdheje. Një dhomë gjumi dhe një zyrë zëvendësuan sallën kryesore, ndërsa blloku i tualeteve u shemb dhe u zëvendësua me një dhomë kopshti. Ai shtoi një mezanin duke rritur sipërfaqen nga 140 m² në 185 m².

Oborri i shkollës u bë hyrja me makinë, dhe një kopsht pas ndërtesës tani është hapësira e tyre private. Pamja e jashtme u ruajt siç ishte, por pjesa e brendshme u rindërtua me një kornizë të re druri dhe izolim modern.

Puna filloi në fund të vitit 2021 dhe tërhoqi vëmendjen e komunitetit. “Shumë njerëz që kishin qenë nxënës aty ndaleshin për të parë nga afër. Dhe ne gjithmonë i ftonim brenda,” thotë Stuart. Në korrik 2022, çifti më në fund u largua nga karavani dhe u vendos në shtëpinë e re.

Totali i shpenzimeve për blerjen dhe transformimin e shkollës arriti 535,000 £. Sot, ajo vlerësohet 850,000 £. Megjithatë, çifti nuk ka ndërmend ta shesë.

“E duam, është një ndërtesë e bukur dhe jemi pranë familjes. Është vendi perfekt për të pritur njerëz,” thotë Stuart.

“Dhoma jonë e ndenjes është vendi ku fëmijët flinin gjumë dikur”

Shkollat tradicionale të fshatrave anglezë, me çatitë e pjerrëta dhe dritaret neo-gotike, u mbyllën masivisht pas viteve ’60 – por janë objekte shumë tërheqëse për t’u kthyer në banesa unike.

Një tjetër çift, Lara Watson (43) dhe Will Jarvis (42), e bënë të njëjtën gjë me një ish-shkollë në Bideford, Devon. Të lindur në rajon, ata jetonin në një apartament me qira në Londër, por në vitin 2018 vendosën të ktheheshin në rrënjët e tyre për të krijuar familje.

Fillimisht humbën ofertën për ndërtesën e ndërtuar më 1882, por një vit më vonë ajo doli sërish në shitje dhe ata vepruan menjëherë. Objekti kishte qenë shkollë, pastaj pronë e “Salvation Army”, më pas studio artistësh dhe shtëpi pushimi. Ishte transformuar në një shtëpi me pesë dhoma dhe dy banjo rreth 30 vjet më parë.

Ajo që i tërhoqi më shumë ishte ruajtja e dhomës kryesore me tavan të lartë. “Dritaret ishin akoma nga dyshemeja deri në tavan,” thotë Lara.

Ata e blenë për 265,000 £ në fund të 2019-s dhe u zhvendosën aty, duke nisur një proces të gjatë vetë-restaurimi ndërkohë që rritnin dy djemtë e tyre, Wren (6) dhe Raff (4).

Lara postoi në Facebook duke pyetur nëse dikush e mbante mend shkollën. “Mora mesazhe të bukura. Një person më shkroi se dhoma jonë e ndenjes ishte vendi ku fëmijët flinin çdo ditë. Një tjetër më tha se ende mban mend shpimet nga dërrasat e dyshemesë.”

Gjashtë vite më vonë, shtëpia është ende në rikonstruksion. Çifti ka përmirësuar kuzhinën, banjot, kopshtin, dhe korridoret që janë aq të gjëra sa fëmijët mund të ngasin biçikletën brenda.

Dritaret kishtare mbeten për t’u zëvendësuar, ashtu si suvaja e brendshme dhe e jashtme. Por ata po kursejnë dhe nuk kanë marrë kredi për të financuar punimet.

“Na ka shkuar mendja se do na kushtojë shumë, por është një vend i veçantë për fëmijët tanë,” thotë Lara. “Jam e sigurt që do e shesim me përfitim në të ardhmen, për shkak të punës që kemi bërë dhe sa unike është kjo shtëpi.”