Kuvendi mban seance te jashtezakonshme per shpalljen e pavaresise dhe simboleve shteterore

Prishtinë, 17 shkurt - Presidenti dhe kryeministri i Kosovës, Fatmir Sejdiu dhe Hashim Thaçi, i dorëzuan sot një kërkesë Kuvendit të Kosovës që ta thërrasë një seancë të jashtëzakonshme, në të cilën do të miratohet deklarata e shpalljes së pavarësisë së Kosovës dhe miratimin e simboleve të reja shtetërore. Këtë e bëri të ditur, kryeministri i Kosovës Hashim Thaçi në një konferencë për media në Qendrën e Medieve në Prishtinë. "Dua t'ju informoj se kam pasur kënaqësinë, nderin, por edhe përgjegjësinë shtetërore që para pak çasteve t'ia dorëzoj kryetarit të Kuvendit të Kosovës në bashkëpunim me Presidentin e Kosovës, kërkesën për seancë të jashtëzakonshme sot", tha para gazetarëve Thaçi. Në përmbajtje të letrës së dorëzuar Kuvendit të Kosovës thuhet se ndodhemi në prag të momentit më të rëndësishëm të historisë sonë. Kryeministri Thaçi theksoi e tani është koha që të marrim vendime të cilat do ta bëjnë vendim tonë pjesë të kombeve të lira dhe të pavarura. "Kam kërkuar nga Kuvendi i Kosovës për një seancë të jashtëzakonshme që ta miratojë deklaratën e pavarësisë dhe miratimin e simboleve shtetërore të Kosovës", tha kryeministri Thaçi, duke shtuar se kjo kërkesë është nënshkruar nga Presidenti Sejdiu dhe ai vetë. Në këto momente (rreth orës 12.15) Kryesia e Kuvendit është duke e shqyrtuar kërkesën për seancë të jashtëzakonshme.