Humbem piktorin dhe petagogun Hasan Çapari sot me 25 mars 2026

Lindur në vitin 1939, Mjeshtri Hasan Çapari është një nga koloristët më të mëdhenj shqiptarë. Në procesin e tij të gjatë krijues ai ka reflektuar një frymëzim të madh, një gjendje emocionale ndikuese, të fuqishme, pra një ndjesi të përgjithshme poetike.

Mund të cilësohet si njëri nga pionierët e artit postmodern shqiptar, me një ndjenjë të theksuar lirie dhe ëndërrimi, me një shprehje të fuqishme ekspresioniste dhe me aftësi të jashtëzakonshme ndiesore, sensitive, idealizuese e konkretizuese.

Në veprat e tij koha dhe arti shprehin shkëlqyeshëm njëri tjetërin.

Në sagën pikturale të Hasan Çaparit ka mjaft vepra, disa prej të cilave janë pjesë e koleksionit të Galerisë Kombëtare të arteve (Violinistja, 1981, Portret vajze 1972), si dhe të galerive private.

Në tablotë, akuarelet dhe portretet e tij, por jo vetëm në to, bie në sy mënyra stilizuese e formave, ngjyrave dhe vetë kuadrimit të motivit.

Me një vizatim të thukët, përmbajtësor, duke vështruar njerëzit e thjeshtë, ai ka pikturuar jashtëzakonisht bukur psikologjinë dramatike të portretit dhe të figurës. Në veprat e tij ka një ndjesim të lartë të shprehjes ekspresive, ku spikat koloristika e shfrenuar, efektet dramatike, emocionale, dhe tonalitetet e ngjyrave. Krijimtaria e H. Çaparit karakterizohet nga fizionomia e pangatërrueshme e stilit të fortë ku, padyshim, elementi ngjyrë përcakton të veçantën. Ngjyrat në tablotë, peizazhet, por edhe portretet e tij, ku spikat bluja, e kuqja dhe e bardha, kanë një lloj ndezjeje të brendshme, dicka sugjestionuese, tëpër të ngrohtë, që përcjellin ndjesi të forta të jetës dhe janë përdorur nga piktori artistikisht dhe funksionalisht.

E gjithë vepra e Hasan Çaparit afirmon mesazhe identiteti ku Çamëria, vendlindja e të parëve të tij, duket si pikë referimi kulturor. Hasani ishte një nga fëmijët e mbijetuar të gjenocidit në Çamëri, ku u lind në vitin 1939, dhe përjetoi kalvarin e shpërnguljes me dhunë në vitin 1944, së bashku me familjen. Çaparenjtë janë një familje e shquar dhe fisnikërore e Çamërisë, me ndikim të madh historik dhe atdhetar, veçanërisht të njohur në zonën e Margëllëçit.

Siç thotë studiuesi i artit dhe shkrimtari Luan Rama, “Jeta e Hasan Çaparit është në veprën e tij, e gjitha e derdhur mbi telajo, mes ngjyrash që na sjellin motive jete e dashurie për dheun e të parëve të tij në Çamërinë tonë të bukur, por po me aq dashuri e frymëzim ka realizuar ai motive nga i gjithë atdheu ynë, të cilit iu dedikua pa asnjë rezervë me artin e tij, si një emër dinjitoz e përfaqësues i një brezi që bëri art të madh.

Hasan Çapari, padyshim është ndër emrat e piktorëve shqiptarë që, pavarësisht kohështrirjes së krijimtarisë në dy sisteme politikë, ia ka dalë suksesshëm të ruajë kohezionin e përjetimit artistik dhe materializimin e tij në veprën artistike”.