4 Tetor 2022

Banorët e lagjes numër 5 në Durrës të cilët kanë mbetur jashtë shtëpive të tyre si pasojë e dëmtimeve nga tërmeti, kanë dalë sot në protestë pasi kundërshtojnë zhvendosjen në periferi të qytetit.

“Pushteti dhe shteti janë bërë bashkë për të vjedhur pronat tona. Unë dua pronën time nuk dua asgjë falas”, shprehet njëri prej tyre.

Ndërkohë një tjetër banore e zonës thotë se deputeti i zonës që është edhe kryeministri i vendit duhet të zbatojë vendimet e duhura për lagjen ku ata jetojnë. Ajo paralajmërojnë se nëse nuk përmbushen kërkesat e tyre do të vendosen në atë zonë duke ngritur çadrat.

“Unë jam banore e lagjes numër 5. Të gjithë ne që jemi të dëmtuar nga tërmeti do kalojmë në zonë e re. Ne duam të prishet dhe të rindërtohet aty ku e kemi. Duam të rishikohet bonusi i qirasë. Duke filluar nga sot do të ngremë çadrat këtu ku jemi. Nga këtu do shkojmë te kryeministri. Dua t’i bëj thirrje kryetarit të bashkisë dhe deputetit të zonës njëkohësisht që e kemi edhe kryeministër që të marrë vendimet e duhura për lagjen numër 5. Nuk kërkojmë asgjë. Ne nuk përballojmë dot qiratë. Ne jemi në pritje deri këtu”, thotë ajo.

Gazeta Shqiptare