KQZ nuk pranon “Lëvizjen Bashkë”, Partine e Arlind Qorrit në zgjedhjet vendore. Qorri: – Atentat i rrezikshëm ndaj demokracisë dhe pluralizmit
9 Mars 2023
“Lëvizja Bashkë” njoftoi se sot KQZ në kundërshtim me ligjin e perjashoi subjektin politik në zgjedhjet lokale të 14 majit.
A. Qorri i pergjigjet KQz-se.
“Komisioni Qëndror i Zgjedhjeve nuk donte t’ia dinte për nenin 64 të Kodit Zgjedhor, nuk donte t’ia dinte për faktin se Lëvizja BASHKË ka qenë viktimë e një padrejtësie nga gjykata e Tiranës në tejkalimin e çdo afati. Madje nuk donte t’ia dinte as për precendentin që vetë ka vendosur në vitin 2019 duke regjistruar Bindjen Demokratike në kushte edhe më të pafavorshme.
Komisioni Qendror i Zgjedhjeve sot lau duart si Pons Pilati dhe bëri një nga atentatet më të rrezikshme ndaj demokracisë dhe pluralizmit në këto 30 vitet e fundit.
Ky mund të jetë haraçi që Lëvizja BASHKË duhet të paguajë sepse ka qenë kundër të gjithë elitës politike dhe ekonomike të Shqipërisë.
Po kjo nuk na bën të dorëzohemi. Ne do ta apelojmë këtë vendim të padrejtë dhe në një mënyrë ose në një tjetër, me solidaritetin dhe mbështetjen e qytetarëve të Tiranës, Lëvizja BASHKË do të jetë pjesë e zgjedhjeve të 14 majit, pavarësisht maliqëve dhe maliqërisë së të gjithë të pushtetshmve e të korruptuarve të sotëm”-deklaroi drejtuesi i saj, Arlind Qori.