Universiteti i Shkodrës Luigj Gurakuqi Universiteti i Shkodrës “Luigj Gurakuqi” shpreh ngushëllimet më të ndjera për ndarjen nga jeta të Prof. Kahreman Ulqinit.

Me trishtim të thellë morëm lajmin për humbjen e profesorit, historianit dhe etnologut tonë të shquar. Në këtë moment dhimbjeje, i gjithë komuniteti akademik i UNISHK bashkohet me familjen Ulqini, duke nderuar kujtimin e një njeriu që tërë jetën e tij ia kushtoi ndriçimit të rrënjëve të kombit shqiptar.

Prof. Kahreman Ulqini nuk ishte thjesht një studiues, por një autoritet moral dhe shkencor, vepra e të cilit mbi strukturat tradicionale dhe harmoninë fetare mbetet një testament i gjallë në arkivat e albanologjisë. Shkodra dhe universiteti ynë sot humbasin një mendje të ndritur, por ruajnë me krenari një trashëgimi të përjetshme që ai la pas.

I përjetshëm qoftë kujtimi i Tij! Shpirti i tij u prehtë në paqe!