21 Dhjetor 2025A

Arkitektë, inxhinierë, urbanistë dhe artistë nga Shkodra kanë reaguar ashpër kundër planit të Bashkisë Shkodër për zonën muzeale, duke e konsideruar atë një kërcënim serioz për qendrën historike të qytetit dhe një hapje të rrezikshme ndaj ndërtimeve shumëkatëshe. Sipas tyre, ky plan dëmton identitetin urban dhe kulturor të Shkodrës.

Përfaqësuesit e këtyre fushave akuzojnë kryetarin e Bashkisë Shkodër, Benet Beci, dhe stafin e tij për veprime të errëta dhe të kundërligjshme, të cilat bien në kundërshtim me lejet e miratuara nga Ministria e Kulturës dhe Agjencia Kombëtare e Zhvillimit të Territorit. Duke shprehur shqetësim të thellë për situatën e krijuar, specialistët bëjnë thirrje për ndalimin e menjëhershëm të këtij projekti, të cilin e cilësojnë si një “masakër” ndaj trashëgimisë historike të qytetit.