22 Dhjetor 2025

Një gjeneral rus u vra mëngjesin e kësaj të hëne, pasi një pajisje shpërthyese shpërtheu nën makinën e tij në Moskë, ndërsa hetuesit kanë deklaruar se pas sulmit mund të jetë Ukraina, duke bërë kështu këtë rast të tretin të vrasjes së një oficeri të lartë ushtarak brenda një viti.

Lajmi u konfirmua nga Svetlana Petrenko, zëdhënëse e Komitetit Hetimor të Rusisë, agjencisë kryesore të hetimeve penale në vend. Ajo tha se gjenerali Fanil Sarvarov, kreu i Drejtorisë së Trajnimit Operativ të Forcave të Armatosura të Rusisë, vdiq nga plagët e marra.

“Hulumtuesit po ndjekin shumë pista lidhur me këtë vrasje. Njëra prej tyre është se krimi është orkestruar nga shërbimet e inteligjencës ukrainase,” tha Petrenko, citon Associated Press.

Pak më shumë se një vit më parë, më 17 dhjetor 2024, gjenerali Igor Kirillov, kreu i forcave për mbrojtje bërthamore, biologjike dhe kimike, u vra nga një bombë e fshehur në një skuter elektrik jashtë ndërtesës së tij. Asistenti i Kirillovit gjithashtu humbi jetën. Shërbimi i sigurisë së Ukrainës mori përgjegjësinë për sulmin.

Një shtetas uzbek u arrestua shpejt dhe u akuzua për vrasjen e Kirillovit në emër të shërbimit të sigurisë ukrainas.

Presidenti rus Vladimir Putin e përshkroi vrasjen e Kirillovit si një “gabim të madh” të agjencive të sigurisë së Rusisë, duke theksuar se ato duhet të mësojnë prej tij dhe të përmirësojnë efikasitetin e tyre.

Por në prill, një tjetër oficer i lartë rus, Lieutenant gjenerali Yaroslav Moskalik, zëvendëskreu i departamentit kryesor operacional në Shtabin e Përgjithshëm, u vra nga një pajisje shpërthyese e vendosur në makinën e tij të parkuar pranë ndërtesës së tij jashtë Moskës. Një person i dyshuar u arrestua shpejt.

Moska gjithashtu ka fajësuar Ukrainën për disa shpërthime dhe sulme të tjera në territorin rus.