31 Gusht 2025

Një plan i diskutueshëm për të ardhmen e Gazës pas luftës po qarkullon në korridoret e administratës së presidentit amerikan Donald Trump. Sipas Washington Post, plani parashikon një administrim amerikan të territorit për të paktën një dekadë, “zhvendosje vullnetare” të banorëve palestinezë dhe rindërtimin e enklavës në një destinacion turistik dhe qendër industriale.

Në dokumentin 38-faqësh që ka siguruar Washington Post, propozohet që rreth 2 milionë banorë të Gazës të zhvendosen përkohësisht në “zona me qasje të kufizuar” brenda ose jashtë territorit, ndërsa zhvillohet rindërtimi. Ndërkohë, një numër vendesh mesdhetare do të strehojnë kampet e përkohshme të ndihmës humanitare.

Plani mban emrin “GREAT Trust” (Gaza Reconstitution, Economic Acceleration and Transformation Trust – Rindërtimi i Gazës, Përshpejtimi Ekonomik dhe Transformimi) dhe është hartuar nga një organizatë e quajtur Humanitarian Foundation for Gaza (GHF), e cila mbështetet nga SHBA dhe Izraeli, por me financim të paqartë.

Stimuj financiarë për ata që largohen

Sipas planit, çdo palestinez që do të pranojë të largohet do të përfitojë 5.000 dollarë në dorë, subvencione për qira për 4 vite dhe ushqim për një vit. Ndërkohë, pronarëve të tokave në Gaza do t’u ofrohet një “kupon dixhital” në këmbim të të drejtave për zhvillimin e pronës së tyre, e cila do të shndërrohet në zonë turistike apo industriale.

Megjithëse plani nuk është bërë publik nga Shtëpia e Bardhë, ai përputhet me deklaratat e mëparshme të Trump, i cili më 4 shkurt kishte shprehur se SHBA duhet të “marrë nën kontroll Gazën e shkatërruar dhe të uritur”, për ta kthyer në “Rivierën e Lindjes së Mesme” pasi të zhvendoset popullsia.

Kritika nga OKB dhe organizata humanitare

Deklarata e Trump ka shkaktuar zemërim të madh mes palestinezëve dhe organizatave ndërkombëtare humanitare, të cilat paralajmërojnë për një zhvendosje të detyruar masive që do të përbënte shkelje të ligjit ndërkombëtar.

Që nga maji i vitit 2025, kur GHF nisi aktivitetin e saj, mbi 1.000 persona janë vrarë duke kërkuar ndihmë pranë qendrave të fondacionit, sipas OKB-së. Shumica e tyre janë qëlluar nga forcat izraelite në afërsi të këtyre objekteve.

Sulme të reja në Gazë – paralajmërohet ofensivë e madhe

Gjatë natës së kaluar, forcat izraelite sulmuan masivisht periferitë e qytetit të Gazës nga toka dhe ajri, duke shkatërruar banesa dhe duke detyruar mijëra banorë të largohen. Këshilli i Sigurisë i Izraelit pritet të mblidhet sot për të diskutuar një plan për pushtimin e qytetit.

Komiteti Ndërkombëtar i Kryqit të Kuq paralajmëroi kundër evakuimit masiv të popullsisë civile, ndërsa ushtria izraelite e ka quajtur evakuimin “të pashmangshëm” para fillimit të një ofensive të përgjithshme kundër Hamasit.

Në 23 muaj luftë, Gaza është shkatërruar gati plotësisht. Vetëm të shtunën, sipas Shërbimit të Mbrojtjes Civile palestineze, 66 persona u vranë nga sulmet izraelite në qytetin e Gazës dhe zonat përreth.

Pavarësisht presionit ndërkombëtar dhe atij të brendshëm, qeveria e Benjamin Netanyahut mbetet e vendosur për të vazhduar ofensivën.

Nga Gazeta Panorama