Vukmiroviç pret debutimin: Besëlidhja është super
Në këtë seksion: Sporti · 8 artikuj ↓
Besëlidhja zhvilloi dje ndeshjen e zakonshme të kontrollit brenda grupit për të testuar formacionin që do të luajë të shtunën ndaj Kamzës.
Një prej afrimeve të janarit është edhe mesfushori serb Nebojsha Vukmiroviç. Ai ende nuk ka debutuar me lezhjanët, pasi në takimin e parë në Mamurras nuk u aktivizua për asnjë minutë.
"Ka rreth një muaj e gjysmë që jam grumbulluar me Besëlidhjen në Lezhë dhe po e ndiej veten shumë mirë. Është një skuadër mjaft e kompletuar nga të gjitha pikëpamjet, por më kryesorja stafi teknik dhe futbollistët janë në lartësinë e duhur.
Edhe pse jemi në vend të tretë, ndodhemi vetëm një pikë larg skuadrës kryesuese. Tashmë e kemi lënë mbrapa ndeshjen me Mamurrasin dhe jemi fokusuar te sfida ndaj Kamzës. Mezi po e pres debutimin me Besëlidhjen. Ngjitja në Superiore na takon ne, pasi jemi skuadra më e kompletuar dhe që e meritojmë të ngjitemi aty", shprehet mesfushori serb në prononcimin e tij. Ekipi po vazhdon normalisht përgatitjet për sfidën e së shtunës.
Përgatiti: Preng Gjikola