Ndodh në Kosovë, trajnerët janë më të paguar se lojtarët
Në këtë seksion: Sporti · 8 artikuj ↓
Trajnerët në Kosovë paguhen më shumë se lojtarët. "Si askund tjetër në botë, këtu trajnerët paguhen më shumë se futbollistët! Rroga e një trajneri sillet rreth 500 euro, derisa ajo mesatare e lojtarëve nuk shkon më shumë se 300-350 euro.
Njohësit e futbollit thonë se kjo ndodh për shkak të mungesës së profesionalizmit nëpër klube dhe mungesës së trajnerëve në treg", shkruante dje gazeta "Zëri" në Kosovë.
Në ndryshim nga vendet e tjera, ku lojtarët paguhen më shumë se trajnerët, në Kosovë ndodh e kundërta. "Te ne ndodh ky fenomen sepse shumica e klubeve nuk janë profesionale.
Ndoshta edhe në Europë kemi ndonjë trajner më të paguar se ndonjë lojtar, por jo në klubet e mëdha siç janë Real Madrid, Barcelona etj. Paramendoni të jetë trajneri më i paguar se Ronaldo, Mesi apo Ibrahimovic! Kjo do të ishte e pakuptimtë. Normal që edhe ata trajnerë duhet të paguhen, siç paguhen me shuma të mëdha, por jo më shumë se futbollistët kryesorë", u shpreh trajneri Arsim Plepolli.
Ndërsa Abedin Zeka, kryetar i Trepçës '89, insiston se në Kosovë ka mungesë të trajnerëve, prandaj ndodh që, ata të cilët i marrin në dorë klubet, kanë paga kryesisht më të mëdha se lojtarët e tyre.
"Ka edhe futbollistë që paguhen më shumë se trajnerët, por në përgjithësi trajnerët në futbollin kosovar kanë paga më të mëdha sesa lojtarët. Ndoshta është arsye e mungesës së trajnerëve, nuk ka shumë trajnerë në treg", nënvizoi Zeka.
Sipas tij, kjo ndoshta është trashëguar nga ish-trajnerët e kohës së komunizmit. Ai shton se trajnerët në vend nuk thonë ndonjëherë, "po punoj 2-3 herë në muaj prej vullnetit, pa para". "Trajnerët s'kanë përgjegjësi, edhe nëse e humbin titullin nuk japin përgjegjësi. E në ndërkohë ankohen se janë të pambrojtur", përfundoi Zeka.