Ndihmoi Barçën me dy gafa, do arbitrojë edhe kundër Realit
Në këtë seksion: Sporti · 8 artikuj ↓
Arbitri që do të gjykojë duelin midis Barcelonës dhe Realit të Madridit është Sançez Martinez. Për të do të jetë hera e parë që i besohet një ndeshje kaq e rëndësishme, kur cilësohet edhe si një prej "bilbilave" me më shumë të ardhme në Spanjë.
Por, nuk kanë munguar edhe kritikat e ashpra për këtë zgjedhje. Vetëm më 20 mars, ai u kritikua ashpër për dy gafa skandaloze në gjykim, të cilat ndihmuan në mënyrë direkte Barçën. Në duelin midis Vijarealit dhe katalanasve, i cili përfundoi në barazim 2-2, ekipi i Luis Enrikes u favorizua në dy episode.
Në minutën e 23-të, Xherard Pike u rrëzua në zonë dhe i hoqi topin nga këmbët me dorë Denis Suarezit në mënyrë të qartë.
Penallti dhe minimalisht karton i verdhë për mbrojtësit, por Sançez Martinez lejoi vazhdimin e lojës. Ndërkohë, në të 41-ën akordoi një 11-metërsh të paqenë në favor të Barcelonës.
Nejmar ishte përballë portierit Asenjo dhe në ndërhyrje ky i fundit i largoi topin. Rrëzimi i brazilianit nuk ishte faull, por këtë herë gjyqtari mendoi të kundërtën dhe drejtoi gishtin nga pika e bardhë. Menjëherë pas këtyre dy gafave do të arbitrojë sërish Barçën, madje kundër Realit...