Juventus-Bajern, sfida që vlen 980 milionë euro
Në këtë seksion: Sporti · 8 artikuj ↓
Juventus-Bajern do të jetë tërheqëse për t'u parë jo vetëm prej kampioneve që do të "parakalojnë" në fushë. Ky duel është një përballje e dy ekipeve që udhëhiqen nga e njëjta filozofi.
Ndryshe nga ç'ndodh me simotrat e tyre nëpër botë, shoqëritë në fjalë përveç sukseseve sportive i kanë vendosur vetes për qëllim arritje edhe në fushën financiare. Stadiumi privat dhe shifrat e mëdha të arkëtuara janë emëruesi i përbashkët i këtyre dy ekipeve që për momentin kanë diferenca të mëdha në cilësinë e skuadrave që rreshtojnë në fushë.
Shumë kampionë - Skuadra e Bajernit të Mynihut, e cila ka një moshë mesatare relativisht të re (26,50), është e pasur me lojtarë, të cilëve kartoni u vlen shumë. Në portë qëndron Nojeri, i cili vlen 45 mln euro. Ndërkohë që për t'u përmendur janë edhe futbollistë si: Boateng (40), Martinez (25) dhe Alaba (45).
Në mesfushë, lojtarë si Vidal (37) dhe Tiago (25) rrisin edhe më shumë çmimin e ekipit që kam shifra stratosferike nëse llogarisim edhe sulmues si Levandovski (70), Myler (75) , Gëce (40) dhe Duglas Kosta (35). Në total 26 lojtarët e Bajernit kushtojnë plot 578,55 milionë euro.
Krenaria e "Zonjës" - Për të mbajtur lart krenarinë e "Zonjës së vjetër" mendojnë Leonardo Bonuçi (30) dhe Aleks Sandro (24). Italiani dhe braziliani janë lojtarët më të shtrenjtë të repartit defensiv të Juves. "Diamanti" i piemontezëve qëndron në mesfushë.
Sipas të dhënave që ofrohen nga portali i specializuar për vlerat e kartonëve të lojtarëve, "Transfermarkt", Pol Pogba është futbollisti më i shtrenjtë i bardhezinjve, pasi vlen plot 55 milionë euro. Në këtë repart lojtarët e tjerë që rrisin vlerën e ekipit janë Markizio (30) dhe Khedira (18).
Në sulm më të shtrenjtët janë Paulo Dibala (36), Alvaro Morata (23.50) dhe Huan Kuadrado (25). Në total, vlera e 26 lojtarëve të Juves (27,35 është mosha mesatare e grupit), shkon në 379,80 milionë euro.
Arkëtimet - Në bilancet e klubeve respektive, dallohet qartë diferenca e madhe edhe në arkëtime. Në vitin e fundit, Bajerni ka arkëtuar 474 milionë euro, ndërkohë që Juventusi 324 mln euro.