Curri mund te braktise Shqiperine per Kosoven
Në këtë seksion: Sporti · 8 artikuj ↓
Në të ardhmen, Përfaqësueses së Kosovës mund t’i bashkohet edhe një tjetër futbollist që përfaqëson aktualisht ngjyrat kuqezi të Shqipërisë. Bëhet fjalë për Debatik Currin, i cili nuk e ka përjashtuar mundësinë që në të ardhmen t’i bashkohet ekipit të Albert Bunjakut.
Futbollisti prishtinas ka mbetur jashtë ekipit të parë të Xhiani De Biazit prej një kohe të gjatë, për shkak të një dëmtimi të rëndë të pësuar në periudhën kur luante për Gençlerbigligi. Por, edhe pas shërimit, trajneri italian nuk e ka parë të arsyeshme ta aktivizojë ish- futbollistin e Prishtinës, i cili zakonisht përfundon në stolin rezervë.
Kjo ka bërë që Curri, i cili e nisi karrierën si futbollist ofensiv, ta shqyrtojë pozicionin e tij tek kuqezinjtë. Ai nuk ka pasur kontakte zyrtare me drejtuesit e futbollit kosovar, por nuk ua mbyll dyert atyre asnjëherë.
“Nuk kam pasur ndonjë kontakt zyrtar, por nuk i dihet kurrë. Unë nuk kam ndërmend të bëj një rrugë të gjatë dhe të qëndroj në stolin rezervë tek Kombëtarja. Prandaj, Kosova mbetet gjithmonë opsion i hapur”, ka thënë Curri për mediat kosovare.