Kroatet te bindur te kualifikimi

“Nëse do tregojmë durim dhe disiplinë, atëherë besoj se nuk do jetë shumë problem për ta kaluar Turqinë”, kërkoi nga shokët e tij të skuadrës për ndeshjen e sotme, mesfushori 36-vjeçar Niko Kovaç. Për trajnerin kroat, Slaven Biliç, një gjë është mjaft e qartë: “Nuk ka rëndësi se çfarë mund të ndodhë në çerekfinale, ne jemi një skuadër e madhe dhe unë jam mjaft krenar për këta djem që kam përreth vetes”. Kundër Turqisë në çerekfinale trajneri Biliç kërkon të hedhë në fushën e lojës formacionin e tij më të mirë, që doli fitues një javë më parë kundër Gjermanisë. Në stërvitjen e skuadrës janë kthyer edhe dy mesfushorët Ivan Rakitiç dhe Dario Srna, të cilët kohët e fundit kanë pasur disa probleme muskulore. Kundërshtarin e radhës Biliç e ka analizuar gjatë nëpërmjet videokasetave. “Ata janë shumë të fortë teknikisht dhe taktikisht, por edhe si çdo skuadër tjetër, edhe kjo defektet e veta, të cilat ne duhet t’i shfrytëzojmë në mënyrën më të mirë - u shpreh tekniku i përfaqësueses kroate Slaven Biliç. – Gjithsesi, ne jemi skuadra më e mirë”. Ndeshja e parë në një Evropiani për Kroacinë ka qenë pikërisht kundër Turqisë në Evropianin e vitit 1996, ku kroatët kanë fituar me rezultatin minimal 1-0. “Më kujtohet shumë mirë ai takim. Ishte ndeshja jonë e parë si një shtet i pavarur në një kampionat Evropian - deklaroi Slaven Biliç, i cili kërkon të kalojë një tur më tej. - Ne duhet të shkojmë të qetë në këtë përballje, pasi edhe çerekfinalja është një ndeshje si gjithë të tjerat”, theksoi Biliç.


Kroati Kranjçar kërkon gjysmëfinalen


Mesfushori i Kombëtares kroate, Niko Kranjçar, është mjaft i bindur te kualifikimi për në gjysmëfinalet e këtij Evropiani. “Ne i vlerësojmë turqit, pasi janë kualifkuar për në çerekfinale dhe kundër Çekisë kanë zhvilluar një ndeshje mjaft të mirë. Por ne besojmë shumë te kualiteti ynë dhe jam mjaft i sigurt që do kualifikohemi më tej - deklaroi mesfushori i avancuar Kranjçar. – Çdo skuadër në çerekfinale ka një shans, por nga ana tjetër ne kemi një skuadër më të mirë. Ne gjithnjë e kemi treguar se çfarë kemi mundësi të bëjmë, edhe kësaj radhe jemi gati ta përsëritim një gjë të tillë. I gëzohem shumë kësaj ndeshjeje”. Organizatori i skuadrës së Portsmuthit ka qenë një nga lojtarët kryesorë në fitoren 2-1 ndaj Gjermanisë në fazën e grupeve. “Fitorja 2-1 ndaj Gjermanisë ishte perfekte. Jam ndjerë mjaft mirë në sulm, pasi kam luajtur edhe më parë në këtë repart”, theksoi Kranjçar.


PanoramaSport