Berisha: 21 janari do të hetohet nga Kryeprokurori i ri

Kryeministri: 21 janari do hetohet nga Kryeprokurori i ri, Ina Rama donte të arrestonte oficerin që evakuon kreun e Qeverisë

Kryeministri Sali Berisha i quan heronj drejtuesit e Gardës që mbrojtën Kryeministrinë në protestën e 21 janarit. Në një intervistë në emision “Fakt” në UTV me gazetarin Çlirim Peka, kreu i qeverisë akuzoi kryeprokuroren Ina Rama dhe kreun e shtetit për atë ngjarje.

Pas ekspertizës së FBI-së i konsideroni heronj punonjësit e Gardës?

Ajo ishte një mbrojtje heroike e institucioneve. Në pati tejkalime të ligjeve?! Jam unë i pari që i thirra institucionet të hetojnë nëse pati apo jo tejkalim ligji. Por një gjë është e sigurt. Institucionet e një vendi të lirë kurrë nuk pushtohen. Institucionet e një vendi të lirë janë pushtimi i kushtetutës nëse i pushton ato; ato janë të garantuara me ligjet kushtetuese të vendit. Ata mbrojtën në një rrebesh të pafund gurësh, shishe molotov, kallëp dinamiti që u hodhën drejt tyre dhe e vërteta është se mbrojtën integritetin e ndërtesës së Këshillit të Ministrave. Të qëndrosh në ato kushte siç qëndruan ata, është akt heroik; të bësh gabime apo faje ose përgjegjësi, ato nxirren të gjitha mbi bazë ligjore, por të nesërmen, siç njoftoi z.Rama, zonja Ina Rama, në orën 5 të mëngjesit kërkoi arrestimin e të gjithë zinxhirit të komandës. Këtu kishte dhe një person që duhej të arrestohej patjetër. Kush ishte ky person? Oficeri përgjegjës për evakuimin e Kryeministrit nga Kryeministria, i cili nuk kishte qenë në fushë-betejë, i cili ka një detyrë, ka rrugën e vet për ta nxjerrë Kryeministrin jashtë rrezikut. Ndërkohë që, natyrisht, ai ishte projekti i tyre, se i imi ishte tjetër, ata janë të detyruar të bëjnë projekte siç bëjnë për Presidentin e Republikës, për kryetaren e Parlamentit, për Kryeministrin, siç bëjnë në të gjithë botën.

Përgjegjësi që ka për detyrë të evakuojë Kryeministrin?

U lëshua urdhër arresti. Ai nuk kishte qenë më 21 janar këtu, ka qenë në zyrën e tij, maksimumi që mund të ketë qenë, ka qenë në linjën nga ata kishin planin e tyre për të evakuuar Kryeministrin dhe ai u fut në zinxhirin e atyre që duhej arrestuar pa asnjë provë. Kjo zonjë bisedon më ministrin e Brendshëm dhe i thotë: Si ka mundësi kjo, se me kë do të mbrojmë nesër institucionet, sepse ky ka deklaruar se nesër do të merremi me horrat e Gardës. Në atë kohë nuk u kuptua se horrat e Gardës do merreshin me Ina Ramën. Kjo i thotë gjëra pa kuptim, jo po të vijnë se unë nuk i arrestoj, edhe po të vijnë do t’i mbaj. Me një fjalë, del qartë skenari. Vjen dhe më thotë ministri. I them se ky është një skenar, kjo është faza B, sepse dështuan dje, mendoj se do të fitojnë sot. Sot do të humbasin më keq. Dështuan gjërat kaq. Thotë se sot po shkoj te Presidenti. I them jo, mos shko fare te Presidenti, sepse Presidenti nuk është autor i arrestimit të tyre. Kjo këtë nuk e merr kurrë. Një prokuror, pa qenë i çmenduar, nuk lëshon dot një urdhër të tillë po nuk qe pjesë e këtij skenari dhe pjesë e këtij skenari prokurori nuk mund të jetë kurrë pa Presidentin. Shumë e thjeshtë kjo. Presidenti, në një akt të tillë, kur e shikon kur po shkelen normat, akti i parë, e shkarkon, mbledh Parlamentin, ka mekanizmat e vet. Shkon ministri i Brendshëm dhe çfarë i thotë Shkëlqesia e tij Presidenti i Republikës: “Kujdes ato letrat e tua”. “Të miat?” i thotë ministri. Mos ki merak për letrat e mia. Vjen dhe më thotë mua se kishe pasur të drejtë. Takoj përfaqësuesit e Trupit Diplomatik, u them se kjo është e gjithë situata. Ky është një organizim i këtij zotërisë dhe i them nuk kam marrë asnjë informacion nga Shërbimi Informativ Shtetëror, në një kohë kur shërbimet e huaja më kishin njoftuar dhe unë dija gjithçka. Këta zotërinj shkojnë dhe takojnë zotin Topi dhe zoti Topi u kërkon, se kriza zgjidhet vetëm me zgjedhje të parakohshme. Kjo është e vërteta dhe u nxjerr pikërisht ato teza që kishte organizuar dhe që u dështuan. Zoti Rama do të vinte të mbante fjalim te zyra ime dhe natyrisht, qeveria bëhej e paqenë, dhe pastaj unë, po të kisha shpëtuar prej tyre, do të thirresha të bëja një marrëveshje mbi dhunën dhe forcën, ose dikush tjetër do të përfaqësonte PD-në. Ishte një skenar shumë i studjuar.
Për të qenë pak i qartë. Z. Topi i ka thënë faktorit ndërkombëtar se kjo situatë zgjidhet vetëm me zgjedhje të parakohshme.
Absolutisht po, dhe faktori ndërkombëtar ka dalë nga zyra duke thënë se ai zotëria ka të drejtë. Njëri prej tyre të paktën.

Ai njëri prej tyre a është ai që shqiptarët mendojnë se është aleati kryesor?

Shiko, kurrë nuk më ke dëgjuar mua që unë të dekonspiroj. Është në natyrën time, nuk bëj publike gjëra që nuk duhen bërë.

U shprehët vazhdimisht se keni pasur kontakte me faktorin ndërkombëtar për 21 janarin. A është dakord faktori ndërkombëtar me analizën që i keni bërë gjatë një viti 21 janarit?
21 janari pati një fatkeqësi tjetër të dytë: hetimin. Hetohej nga ajo që duhej hetuar vetë, për herë të parë në historinë e një hetimi, institucioni i akuzës merret përsipër nga një person që duhet të hetohet, Ina Rama dhe po të kishte qoftë edhe një nonagramë moral profesional, ajo kurrë nuk do të merrte përsipër hetimin e kësaj çështjeje, do të kërkonte emërimin e një prokurori të shkëputur prej saj dhe do të pranonte të hetohej nga e para tek e fundit vetë. Por këtë s’e bënte dot, sepse i dilte implikimi. Këtë s’e bënte dot sepse s’e linte Edi Rama. Këtë se bënte dot, sepse s’e linte Bamir Topi. Është e njohur për të gjithë shqiptarët kur ajo dekonspiroi, i tha Edi Ramës, tekstin e bisedës telefonike me Hysni Burgajn. Ishin lëshuar mandatet e arresteve dhe në mandate Ina Rama kishte bërë një gabim teknik dhe Hysni Burgaj, drejtori i Përgjithshëm i Policisë, i thotë: Zonjë, nuk t’i ekzekutoj, por t’i kthej se i ke me lapsuse”.

Edhe Edi Rama del pas 20 minutash konferencë për shtyp: EUREKA, drejtori i Policisë së Përgjithshme, i tha prokurores së Përgjithshme se i ke me lapsuse. Çfarë ndodhi? Ndodhi ajo që këtu u angazhuan Uashingtoni, Brukseli me të gjithë projektorët dhe mundësitë, me telefonatat e tyre dhe kjo zonjë, në mënyrën më të paskrupullt, u bë objekt sulmi publik të institucionit të saj, për amoralitetin profesional, për shitjen e partishme të dokumenteve që i bënte PS-së dhe ju keni këtu, jo një, por një seri deklaratash nga më të rëndat për të, sepse nuk mbahej sekreti, prishej hetimi. Tani unë i jam shumë mirënjohës qeverisë  amerikane, e cila bëri përpjekjet më të mëdha për të ndihmuar këtë hetim. Natyrisht, kishte të bënte me një grup njerëzish më të papërgjegjshmit, por që talleshin me veten e tyre, sepse ata çdo ditë tregonin para botës se nuk kanë vullnet për të hetuar. Pse unë jam në unison me komunitetin ndërkombëtar? Sepse unë nuk kam kërkuar asgjë tjetër përveç hetimit të organizatorëve, hetimit të sulmuesve, të sponsorizuesve të vrasjeve dhe të ngjarjeve të tjera. Nuk mund të ketë një njeri i përkushtuar ndaj ligjit asnjë kërkesë tjetër përveç këtyre. Këto ishin kërkesat e komunitetit ndërkombëtar, këto komuniteti ndërkombëtar i  përsëriti në mënyrë të vazhdueshme. Unë kisha një mundësi.

Që ishte?

Përjashtimi i Ina Ramës nga hetimi. Unë u sulmova, unë ruaja të drejtën e reagimit në mënyrën më absolute kushtetuese së pari dhe e ndoqa këtë. Unë u rrethova, ata që më rrethuan, mund të përballeshin me atë që meritonin, unë u vetëkufizova. Kryetari i opozitës më rrethoi duke ndenjur te Kullat shumicën e kohës, ku kishte veshë dhe sy që e qarkonin aty dhe që e dëgjonin në çdo gjë bashkë me lejtënantët e tij. Unë u rrethova, unë nuk lëviza vendit, qëndrova gjakftohtë. Unë një përgjigje mund t’u jepja dhe mund t’u jepja një përgjigje të merituar. Por çfarë zgjodha? Zgjodha ruajtjen e kuadrit kushtetues ekzistues, sepse kjo zvogëlonte më shumë se gjithë të tjerat dëmin për vendin.

U shprehet se “unë kisha mundësi të përjashtoja”. Me çfarë instrumenti ligjor mund ta përjashtoje nga hetimi?

Po të doja, atë e përjashtoja. Ajo në hetim nuk merrte pjesë, personalisht, pastaj kisha instrumente ligjore, bëja ligj në Parlament. Aty kisha instrumente ligjore. Të jesh i sigurt për këtë, por duke i hequr totalisht besimin, unë pranova që ajo të dalë çdo ditë e më shumë para shqiptarëve në dritën e diellit çdo ditë e më shumë. Erdhi ekspertiza e FBI-së tani, ose edhe e institucioneve tona. Çfarë u bë? U bë gjithçka sipas ligjit. Edhe ato ditë, ndonëse veproi me një duf, vepruan të dy, Presidenti dhe kjo. Vepruan me një duf politik të papërmbajtur. Ne iu thamë merrini në ndjekje, por jo t’i arrestoni pa paraqitur asnjë fakt. Ajo ishte mënyra më e sigurt për të shkatërruar hetimin. Ku e ke balistikën? Bëji këto të gjitha njëherë. A është larguar njëri  nga Shqipëria prej atyre? Të gjithë janë këtu, të gjithë janë disponibël për hetim, pa përjashtim.

Pra nuk do të ketë hetim?

Nga Ina Rama?! Çfarë hetimi?! Nga Ina Rama ka vetëm prishje të provave intensive, shitje të dokumenteve dhe pengesa nga më seriozet të hetimit gjatë një viti.

Të paktën, sipas ekspertizës së SHBA, që ka ndihmuar dhe është shprehur se do të ndihmojmë, dhe jemi të përfshirë në këtë hetim edhe me kërkesën e institucioneve shqiptare. Tashmë duket se një prej fletë-arresteve që ka firmosur kryeprokurorja natën e 21 janarit kishte të drejtë. Bëhet fjalë për komandantin e Gardës.

Plotësisht dakord. Është e vërtetë që u pengua ato ditë për shkak të detyrës, por pastaj s’e pengoi njeri. Erdhi një prokuror amerikan këtu. Kishte një prokuror amerikan dhe prania e tij ishte një nga rrethanat që unë pranova që Ina Rama të vazhdonte.

Në një farë mënyre, e keni përjashtuar, e keni dubluar nga hetimi?

Jo përjashtuar, dubluar, pa diskutim. Pra, pse nuk e lëshoi. Prokurorja mund të kishte të drejtë për komandantin e Gardës dhe mund të kishte të drejtë për çdo gjë, por gjithçka duhet ta bazonte evident, mbi provat, në të cilat duhej të bazohej urdhër-arresti. Kaq ishte e gjithë puna. Edhe dje Prokuroria foli për vrasës, Prokuroria ka një fatkeqësi, përdori gjuhën e Edi Ramës, foli për vrasës, por ata do sqarohen. Kurse prokurorja komunikoi atë që komunikoi Edi Rama. Të shtëna fatale, kjo është ajo që dimë deri tani. Ata kanë deklaruar me qindra herë se u qëlluan me snajper, kjo ishte një pistoletë që duhet të faktohet. Prokurorja është prokurore, po të mos jetë e verbër nga dufi politik dhe problemi i brendshëm i saj, ajo flet, përzgjedh gjuhën e ligjit dhe gjuha e ligjit është të shtëna fatale, pastaj a ishin të qëllimshme, a ishin me nishan, a ishin rikoshetë ato, do të qartësohen. Fakti është se ajo ka një evidencë që e lidh plumbin e të ndjerit Myrtaj me këtë revole.

Me këtë po thoni se familjeve të viktimave se autorët e vrasësve do të hetohen vetëm kur të kemi një kryeprokuror të ri?

Absolutisht, familjeve të viktimave do t’i garantoj se në përputhje me të gjitha kapacitete e shtetit ligjor, gjithçka do të hetohet rreth vrasjes së njerëzve të tyre. Është familja e viktimave të Ziverit në mos gaboj, vëllai i tij tha se erdha nga Greqia se do rrëzojmë Sali Berishën, e kanë të gjitha mediat këtë. Kjo kërkon një hetim. Por këtë hetim, nuk mund ta bëjnë ata të cilët ishin pjesë e këtij puçi për të rrëzuar Sali Berishën, por çfarë ka tjetër. Ata nuk mund të pengojnë ecurinë. Ne bëmë zgjedhjet e 8 majit më të mirat e bëra ndonjëherë në këtë vend, shqiptarët folën me 142 mijë vota kundër kësaj minorance dhe kjo ishte një arritje e madhe. Do të vazhdohet. Ata që vendosën dy mandatet, do të mbarojnë këtë mandat, të mandatuar të tjerë do të vijnë dhe ligji do të behët. Kaq është e gjithë puna.

Pra 21 janari do të hetohet me një kryeprokuror të ri?

21 janari do të hetohet në kushtet më normale, dhe është kush sinekuanon për paqen e këtij vendi që të hetohet, kaq. Nuk zgjidhet 21 janari me listën që bën Edi Rama për hetim. Cili shqiptar mund të thotë këtu, se do të na bindë ne se Besnik Bare qenka më përgjegjës sesa deputetët e filmuar duke nxitur dhunën. Nuk ka ndonjë film për Besnik Baren duke nxitur dhunën para kryeministrisë. Apo ai që mori makinën te Ura e Lanës, para kamerave, e mori duke shtyrë si halabak deri sa e solli këtu dhe ai ishte deputet dhe s’e ka thirrur askush deri më sot dhe thyen rrethimin e kryeministri. Fatmirësisht si në rrugë ashtu edhe në bunkerin ku u kyç Edi Rama që priste për të ardhur dhe mbajtur fjalimin ka pasur dhe ka me qindra dëshmitarë, ka pasur dhe ka me mijëra fotografi, ka pasur dhe ka mijëra orë filmim nga të gjitha kamerat e vendit. Është një ngjarje me e thjeshta për tu nxjerrë, ka pasur dhe ka me qindra deklarata për njerëz të paguar që do rrëzojmë kryeministrin.

Gjithsesi, ato do të bëhen publike. Kryeprokurorja e ka ekspertizën. Ju a jeni informuar se çfarë përmban kjo ekspertizë?

As që kam ndonjë interes për të. Unë jam Kryeministër. Do të informohet i akuzuari, do të informohet avokati i tij, do të informohet gjykatësi. Gjer këtu ky është një proces ligjor që ecën mbi bazën e shinave ligjore, por unë nuk mund dhe nuk kam as edhe një qortim për të gjithë qëndrimin për ekspertizën. Ky është një zhvillim tani që ecën në hullitë e shtetit ligjor. Cila do jetë e vërteta? Prokuroria dha pretencën dje, mori përsipër të bëjë diçka që ishte e diktuar.

Z. Kryeministër, më 21 janar 2011, ish-komandanti i Gardës ka qenë në zyrën tuaj, apo jo?

Në zyrën time?! Ka qenë në zyrën time, me ka thënë, nëse mos gaboj, “a mund të dalësh në një zyrë, dhomë tjetër?”. I kam thënë: “Jam shumë mirë, nuk dal”. Sepse gjuanin te dritaret. Më ka kërkuar që të dal në dhomë tjetër bashkë me oficeret e mi. Nuk di të më ketë thënë gjë tjetër.

A keni lëvizur më 21 janar nga zyra juaj?

Asnjë moment, as nga tavolina ime, as edhe një minutë të vetme.

Në mos gabohem, tavolina juaj është afër dritares, z. Kryeministër?

Aty kam qenë, nuk kam lëvizur, kam qenë aty. Kanë ardhur disa nga bashkëpunëtorët e mi.

Pretendohet se komandanti i Gardës është urdhëruar dhe i është bërë presion nga një prej truprojave tuaj për të hapur zjarr.

Sa për dijeni, truprojat e mia janë vartës të komandantit të Gardës. Duhet ta dinë qytetarët se komandanti i Gardës i ka në varësi të gjithanshme truprojat e mi. Nga truprojat e mi nuk është asnjëri gjeneral. Komandanti i Gardës është gjeneral, kështu që nuk merr urdhra nga asnjë person i vetëm. Nuk mund të marrë urdhër nga asnjë person për të përdoruar armën e zjarrit jashtë kushteve ligjore.

Një tjetër çështje që ka të bëjë me akuzat që bëhen ndaj jo vetëm stafit të Gardës, por edhe stafit të Kryeministrisë, është zhdukja e provave e serverit në Kryeministri. Tashmë pretendohet nga Prokuroria se kjo është e vërtetuar edhe nga ekspertiza e FBI-së. Cila është e vërteta z. Kryeministër?

Nuk dua të futem në teknikalitete, por meqenëse ma bërë këtë pyetje, unë vetëm kaq dua të të them: Ka një raport të dërguar nga Kryeministri lidhur me këtë çështje, i cili, për ata që dinë ta lexojnë, ka të gjithë të vërtetën. Ata që duan ta përdorin politikisht, ai raport aty është dhe ai i nxjerr të gjitha. Së pari, këtu gjithçka është mbi bazën e një rregulli të caktuar. Asnjë punonjës i Kryeministrisë nuk është përgjegjës për sistemin e kamerave jashtë ndërtesës. Punonjësi i Kryeministrisë është përgjegjës për kompjuterët dhe të gjithë sistemin e kompjuterëve, dhe janë dy IT që përgjigjen për këtë. Sidoqoftë, kjo është një  çështje në hetim. Por se cili ka qenë raporti i dërguar nga Kryeministria, kjo është shumë e thjeshtë dhe është publike. Nuk është ai konstatim i FBI-së, ai konstatim është i raportit të dërguar me firmën e sekretarit të Përgjithshëm, Prokurorisë, para se ata të marrin serverin.

Pra ka raportuar stafi i Kryeministrisë se është prekur serveri?

Stafi i Kryeministrisë nuk e ka kompetencën e serverit, por është marrë për t’u kontrolluar, sepse këtu ka disa sisteme kamerash të vjetra. Është marrë kompania që ka bërë të gjithë konstatimin dhe ky konstatim i kompanisë i është dërguar Prokurorisë me vulë dhe me firmë nga Kryeministria para se ata të vijnë dhe të marrin serverin. Unë kam besim të plotë në ekspertizën e kompanisë që kishte vendosur sistemi, sikundër ajo që më bën pak përshtypje, rikuperimi, në dijeninë time, unë nuk jam ekspert, nga softet gjithçka rikuperohet, megjithëse këtë nuk e marr për të vërtete absolute, sepse nuk e di.

Çfarë ju pengon ta zgjidhni vetë Presidentin? Edhe Nano është një kandidaturë politike e konsoliduar ne politikë?

Unë nuk shkruaj kujtime dhe nuk i referohem së shkuarës. Për hir të së vërtetës, Alfred Moisiu nuk është propozuar nga unë, por është pranuar nga unë. Është emër i promovuar nga një anëtar i koalicionit, i pranuar nga unë pasi ai kishte qenë ministër te Partia e Punës dhe zëvendësministër te ne. Kjo është e vërteta. Kishte një rezolutë të PE që i thoshte Shqipërisë që Parlamenti i vitit 2001 nuk shpreh vullnetin e qytetarëve shqiptarë dhe nëse ju zgjidhni me ato vota maxhorance Presidentin, ne nuk do ta njohim. Në këto kushte, unë pranova një kompromis për të ecur drejt një procesi normalizimi të zgjedhjeve.

Kështu që unë nuk them se me z. Moisiu nuk isha dakord, por kjo ka qenë zgjidhja për z. Moisiu. Përsa i përket z. Topi, absolutisht që jam unë me vetëdijen dhe vendosmërinë më të madhe dhe askush tjetër dhe në mënyrë absolute jo nga rrethanat, sepse gjërat e mëdha shumë vështirë të më diktojnë rrethanat mua. Unë kam një natyrë tjetër, nuk i shmang rreziqet, asnjë përpjekje nuk bëj për të shmangur rreziqet. Zotin Topi unë e kandidova për një arsye: një politikan, i cili nuk kishte merita thelbësore, siç përpiqet, por kishte merita, kishte një rëndësi për mua, qenia e tij nga ajo popullatë që na ka mbështetur ne në mënyrën më të fuqishme 20 vjet, se në fakt tiranasit autoktonë kanë qenë mbështetja më e fuqishme që në vitin ‘91 e deri sot, dhe unë kisha shumë kënaqësi që e kandidova. Ky ishte njëri prej tyre, i shkolluar mirë, një intelektual.

Për çfarë ju duhet Presidenti i Republikës? Për çfarë i duhet kësaj maxhorance Presidenti i Republikës?

Po kthehem tek e para. Pse jo zoti Nano? Zoti Nano është lider historik i së majtës shqiptare, sepse z. Nano atë të majtë e solli në pushtet. Z. Nano atë të majtë e transformoi në tërësinë e vet bashkë me disa bashkëpunëtorë, nga antiatlantiste në proatlantiste. Z. Nano atë parti e federoi në Internacionalen Socialiste dhe në Partitë Socialiste Europiane, pra është lideri historik i së majtës. Nuk është z. Nano një ndër personalitetet e së majtës, është njëshi me distancë të theksuar në të majtën shqiptare.

Kjo e bën të pamundur për të qenë President?

Kjo e bën të pamundur që e djathta ta propozojë. Kjo nuk mund të ndodhë, të jem i hapur, e gjithë analizës që iu bë, por nuk mundet që qendra e djathtë të votojë liderin historik të së majtës, sepse kjo përbën në themel një goditje shumë të rëndë për të. Kjo përbën goditje për moralin politik. Ky moral politik është në të gjithë Europën, e tërë Europa është ndërtuar mbi bazën e qendrës së majtë dhe qendrës së djathtë.

Zonja Topalli a është në listën për t’u bërë Presidente?

Absolutisht zonja Topalli është person plotësisht i përshtatshëm, por sikundër janë edhe shumë personalitete të tjera të PD. Midis dy këtyre, zonja Topalli në PD është një person që ka meritat e saj të padiskutueshme. Mendoj se gjatë gjithë kësaj periudhe, 8 vite në opozitë dhe vitet në pushtet, ajo ka një investim të vetin ndër më të rëndësishmit në politikën shqiptare. Ky është vlerësimi im, kështu që në këtë aspekt nuk mund të krahasohen dhe do të ishte absurde të mendosh të krahasosh kontributet e njërit me kontributet e tjetrit.

Jeni shprehur se “unë do të largohem kur të mos më votojnë shqiptarët”…

Absolutisht i qëndroj, ose ai sipër nesh, se ai e ka atë.

Dy ambasadorë të SHBA kanë dhënë dy intervista, Uithers u shpreh me komplimente ndaj jush dhe tha se pas Gërdecit Berisha ndryshoi…

Nuk jam njeri i memorieve. Mund të them dy gjëra: përsa i përket ambasadorit Arvizu, ai është përfaqësues i Presidenti Obama, i Kongresit Amerikan në Tiranë, kjo është e vërteta. Përsa i përket z. Uithers, ai është një qytetar privat amerikan, i cili kur ka qenë në detyrë ambasador, ka pasur rastin dhe fatin të njohë me kthjelltësi më të madhe, qartësinë më të madhe, të gjitha qartësitë e Berishës. Më qartë se kushdo tjetër nuk shkruan. Meqë nuk shkruaj memorie, ai është qytetar privat amerikan. Cilat kanë qenë marrëdhëniet e mia me të, besoj se çdo shqiptar i ka të qarta, por unë i garantoj qytetarët e këtij vendi se gjithçka kam menduar unë ia kam thënë në sy një për një. Të më kërkosh të komentoj intervistën e një qytetari privat amerikan, këtë nuk e bëj.

Po intervistën e Arvizusë? Është shprehur se Berisha përdor një gjuhë të drejtpërdrejtë.

Absolutisht po, ai vjen nga diplomacia, unë vij nga politika të ndryshme. Ai e ka shumë drejt.