e mërkurë, 18 nëntor 2026
Shqiperia.comPortali shqiptar
Sporti

Rukavina: Ne Shqiperi na pret 'ferri', por eshte thjesht nje ndeshje futbolli

Në këtë seksion: Sporti · 8 artikuj ↓
Rukavina: Ne Shqiperi na pret 'ferri', por eshte thjesht nje ndeshje futbolli

Mbrojtësi serb, Antonio Rukavina, ka deklaruar në një intervistë për Telegrafin se përfaqësuesja e Serbisë kërkon fitore në dy ndeshjet e para ndaj Armenisë dhe Shqipërisë, teksa e cilësoi si të vështirë takimin e kthimit në Tiranë.

Rukavina ka folur për Telegrafin rreth grupit në të cilin luan Serbia dhe Shqipëria për Euro 2016. Kualifikimet sipas Rukavinës do të jenë të vështira, teksa nuk e cilëson si ekip shumë të rrezikshëm Portugalinë. I pyetur nga Telegrafi se nëse Grupi I është i vdekjes, Rukavina u pajtua me këtë konstatim.

“E vërtetë, Grupi I është grupi i vdekjes. Është Armenia, një kombëtare e fortë së fundmi, Danimarka, një ekip me futbollistë të mirë, e po ashtu edhe Portugalia, që ka në ekip futbollistin më të mirë në botë. Megjithatë, nuk e konsideroj Porgualinë kundërshtar sikurse Spanjën, Gjermaninë apo Holandën. Ata zakonisht kualifikohen me play-off dhe prandaj them se nuk janë të pamposhtshëm”, u shpreh Rukavina për Telegrafin.

Dy duelet ndaj Shqipërisë që Serbia do t’i zhvillojë, e para e cila luhet në Serbi më 14 tetor të këtij viti, ka zgjuar kurreshtjen dhe entuziazmin e adhuruesve të futbollit, si sfidë më shumë se sportive. Mbrojtësi serb thotë se ky fakt është i pashmangshëm, por se duhet të merret shembull në ndeshjet e kaluara ndaj Kroacisë.

“Faktori politik dhe rivaliteti historik mes dy shteteve do të jetë i pashmangshëm edhe në fushën e lojës, jo vetëm në radhët e tifozëve. Është më shumë se sa një ndeshje futbolli. Por, dua të marr shembull dy ndeshjet ndaj Kroacisë. Është e vërtetë, kemi ndjerë emocion, nuk ishte sfidë normale për shkak të historisë. Kemi ndjerë emocion në trupin e këmbët tona, por në fund ishte ndeshje futbolli. Ishte i mrekullueshëm organizimi dhe gjithçka. Kështu duhet të jetë edhe në ndeshjet ndaj Shqipërisë, që besoj se do të organizohen për mrekulli dhe se incidentet e mundshme do të shmangen”.

“I bëj thirrje të gjithëve që ta marrin si manifest sportiv, pasi ky është futbolli, nuk është ndeshje politike, nuk është luftë, është sport. Të kënaqemi kur të vijë koha t’i zhvillojmë ndeshjet”, theksoi mbrojtësi serb.

I pyetur nëse ai është i bindur se ekipi i tij mund ta mposhtë Shqipërinë, Rukavina nuk e tha në mënyrë të drejtpërdrejt këtë, megjithëse pret që gjashtë pikë nga dy ndeshjet e para, e një prej këtyre ndeshjeve është ndaj Shqipërisë.

“Nuk mund të them se do ta mposhtim sigurtë Shqipërinë. Kështu kemi thënë edhe për Maqedoninë, kur dihet se kemi shumë më kualitet se Maqedonia, por kemi humbur me rezultat 1-0 në Shkup”.

“Mendoj se kemi pasur pak fat për radhët e ndeshjeve që do të luajmë. Ndeshjen e parë shkojmë në Armeni, kurse të dytën e luajmë në shtëpi ndaj Shqipërisë. Ne duhet të marrim gjashtë pikë nga këto dy ndeshje, në mënyrë që kualifikimi të jetë më pas më i lehtë. Shqipëria ka kalendar më problematik, por në çdo rast do të jetë vështirë. Shumë e vështirë do të jetë sidomos në Tiranë. E parashikoj se çfarë mund të na presë kur të shkojmë në Shqipëri”, tha ai.

Rukavina luan përkrah Valdet Ramës te skuadra e Valadolidit që bën pjesë në La Liga. Ndeshjen e ardhshme Valldolidi e zhvillon ndaj Malagas, kurse pas Malagas, Valadolidi përballet me Barcelonën. Rukavina thotë se ndeshja ndaj Malagas është më e rëndësishmja e sezonit.

“Së pari kemi ndeshjen ndaj Malagas. Ajo do të jetë një finale e vërtetë. Është ndeshja më e rëndësishme e sezonit. Nëse fitojmë i shmangemi zonës së rrezikshmërisë dhe zonës së Segunda Divizionit. Ne duhet ta mposhtim Malagan, pasi do të jetë shumë e vështirë ndaj Barcës. Ndaj Barcelons duhet 90 për qind fat, fjalët e tjera për atë ekip janë të tepërta. Ne vërtet po punojmë që të mbijetojmë”, përfundoi Rukavina.

Shqipëria bën pjesë në Grupin I të kualifikimeve për Euro 2016, bashkë me Danimarkën, Armeninë, Serbinë dhe Portugalinë.