Kontrata e Neimar me Barcelonen mund te jete false
Në këtë seksion: Sporti · 8 artikuj ↓
Presidenti i Barcelonës, Sandro Rosell, mund të ketë probleme të mëdha me gjykatat, pasi një hetim për transferimin e Neimarit nga Santosi ka zbuluar se kontrata e brazilianit mund të jetë false.
Blaugranët u detyruan që të dorëzojnë dosjet për detajet financiare të transferimit prej 57.1 milionë eurosh, pas një ankese nga Xhordi Kases.
Rosell shpresoi se ankesa nuk do të merrej parasysh, por hetimi ka nxjerrë parregullsi në marrëveshjen e arritur dhe prokurori i Gjykatës së Lartë ka kërkuar që të dorëzohen dokumentet e tjera kontraktuale, teksa rasti vazhdon të hetohet, raporton “Telegraf”.
Prokurori Hoze Perals ka kërkuar që auditorët e Barcelonës të shfaqin dëshmi për hetimin se ku kanë shkuar 40 milionë euro të cilat nuk i shkuan Santosit (klubi brazilian për një pjesë të kartonit ka pasur të drejtën e vetëm 17.1 milionë eurove).
“Kontratat që janë nënshkruar mes palëve nuk korrespondojnë në asnjë moment me atë që është specifikuar brenda tyre. Kontratat e nënshkruara mund të jenë false për të t’iu ikur disa procedurave të pagesës”, ka thënë prokurori gjatë të premtës.
Barcelona vazhdon të mohojë të ketë bërë ndonjë gabim në këtë transferim, edhe pse katalanasit nuk dinë të precizojnë se kush i mori ato para.
Ndërkohë, një prej pronarëve të palës së tretë të pëfshirë në kartonin e Neimar, rrjeti i supermarketeve DIS, pohon se ka marrë vetëm një përqindje të vogël të asaj që Barcelona i detyrohet nga marrëveshja.