e mërkurë, 18 nëntor 2026
Shqiperia.comPortali shqiptar
Sporti

Kamza-Vllaznia 90-81, finalja e Superkupes ne basketboll degjeneron edhe ne grushte

Në këtë seksion: Sporti · 8 artikuj ↓
Kamza-Vllaznia 90-81, finalja e Superkupes ne basketboll degjeneron edhe ne grushte


KAMZA BASKET-VLLAZNIA 90-81
(20-18, 31-19. 20-14, 19-30)

KAMZA BASKET: Llazani, Gjonaj, Gjoka, Bilali, Sukaj, Hoxha, Domi, Lame, Birçaj. Trajner: Adem Muhametaj.
VLLAZNIA: Bekteshi, Ndoja, Sarajlija, Berdica, Arra, Halluni, Shestani, Taraboshi, Xhexha, Huti. Trajner: Bledar Gjeçi.

GJYQTARËT: Ervin Koçi, Erion Hoxhaj dhe Elvis Allaraj

KOMISAR TEKNIK: Shefqet Bekteshi

Është mbyllur në mënyrën më të keqe të mundshme, me tension e sherr, finalja e djeshme e Superkupës së Shqipërisë. Një prej basketbollistëve shkodranë, Nikolin Arra, ka shpërthyer tejet nervoz ndaj Ervis Allarajt, njërit prej gjyqtarëve, duke e goditur me grusht. Gjithçka ka ndodhur në përfundim të ndeshjes, në korridorin që të çon te dhomat e zhveshjes. Asnjë prononcim nuk ka pasur nga të dy trajnerët mbi ngjarjen. Presidenti i FSHBsë, Ponari, ka debatuar ashpër me trajnerin e Vllanzisë, Bledar Gjeçaj, i cili është larguar me shpejtësi pas përfundimit të takimit, duke mos zbatuar një nga pikat e rregullores, siç është respektimi i aktivitetit, duke mos rreshtuar ekipin. Për rrjedhojë, ekipi shkodran do të përballet me dënime të ashpra siç janë gjobat, plus që rrezikon deri në dy ndeshje.


Ndeshja Për sa i përket takimit, Kamza ka fituar Superkupën e Shqipërisë në basketboll për meshkuj. Në praninë e një publiku që kishte mbushur si rrallëherë palestrën e sportit në Bathore të qytetit të Kamzës, kamzalinjtë të drejtuar nga trajneri i tyre, Adem Muhametaj, kanë mundur në finalen e Superkupës Vllazninë me rezultatin e thellë 90-81. Basketbollistët kamzali e rritën diferencën e avantazhit në mbi 20 pikë që në periodën e tretë. Ndërkohë që protagonistët e këtij suksesi për Kamzën ishin Eni Llazani, Afrim Bilali, kapiten i skuadrës, Sukaj, Gjonaj e Gjoka. Në ceremoninë e organizuar në përfundim të aktivitetit, presidenti i Federatës Shqiptare të Basketbollit, Avni Ponari, dhe sekretari i kësaj federate, Korab Llazani, i dorëzuan kapitenit të Kamza Basket, Afrim Bilali, trofeun për vitin 2013.


Kronika Ndeshja e djeshme rezultoi e pamëshirshme për kamzalinjtë, pasi ata në periodën e fundit shkonin me +20 pikë. Ka qenë loja e shkëlqyer e Eni Llazanit dhe kapitenit Afrim Bilalit ajo që ka bërë të mundur edhe këtë shkëputje. Ndonëse ka nisur një takim i ekuilibruar, ai nuk ka qenë i tillë deri në përfundim të pjesës së parë, pasi Kamza arriti të shkëputej deri në 14 pikë duke e mbyllur këtë pjesë loje 51-37. Në fillim të periodës së parë, loja deri në përfundim të saj shkoi me një diferencë mjaft të ngushtë 1-2 pikë, por triumfuan vendësit 20-18. Fillimi i së dytës ka qenë me një epërsi të dukshme të kamzalinjve, të cilët e kanë fituar atë me një diferencë prej 12 pikësh, 31-19, ndërkohë që pjesa e parë përfundon me një diferencë +14. Fraksioni i dytë ka nisur vrullshëm me pikët e njëpasnjëshme të Llazanit e Bilalit, të cilët kombinojnë mjaft bukur gjatë duke fituar në të gjitha dyluftimet mes tyre dhe shkodranëve. Në periodën e fundit shkodranët janë munduar që të shkurtojnë diferencën e pikëve, madje edhe e kanë fituar atë me rezultatin 19-30, por kjo nuk u ka mjaftuar, pasi diferenca e krijuar nga kamzalinjtë në tri periodat e para ka qenë +20 pikë. Në këtë periodë si gjithmonë shpërthen Bërdica dhe Arra, ku kombinimet e tyre kanë rezultuar efikase. Në fund ka triumfuar me +9 pikë ekipi kamzali, që për herë të parë ka fituar Superkupën e Shqipërisë.

TRAJNERI
Gjeçaj: Arbitrat e kishin fiksuar ndeshjen


Tepër i zhgënjyer dhe me moralin në tokë pas përfundim të finales së Superkupës është shfaqur trajneri i Vllaznisë në basketboll për meshkuj, Bledar Gjeçaj. I kontaktuar nga “Panorama Sport”, kreu i stolit shkodran e ka komentuar humbjen e djeshme ndaj Kamza Basket, duke u shprehur: “Jam vërtet shumë i zhgënjyer dhe i mërzitur. Jo nga humbja, por nga mënyra se si na është vjedhur ndeshja. Sot (dje) kam asistuar një shfaqje të turpshme. Unë kam qenë vetë lojtar dhe sigurisht që jam mërzitur dhe madje kam derdhur lot kur kam humbur, po ndeshjen nuk e humbëm, por na e vodhën”, – ishte komenti i parë i Gjeçajt. Më tej ai ka vijuar të thotë: “Nuk na lanë të luhej basketboll, gjyqtarët e kishin inskenuar që në fillim që të humbisnim. Tani me atë që pashë, e parashikoj se çfarë do të ndodhë dhe në fazën “Play-Off”. Është për të ardhur keq se në këtë sezon kishim krijuar një ekip të mirë, por këta gjyqtarë i kanë hequr dëshirën ekipit për të luajtur. Ky sport më ka rritur, më ka mësuar si të sillem në jetë, të jem i ndershëm dhe i drejtë. Sot në sytë e lojtarëve të mi shikova zhgënjim dhe tani dhe sponsori që kishim po mendon të largohet. Është vërtet e trishtueshme kjo situatë”,- tha ai.

Vllaznia bojkoton ceremoninë


Një finale e mbyllur në mënyrën më të keqe të mundshme, që tregon edhe njëherë problemet e shumta të basketbollit shqiptar. Pas ngjarjes së rëndë, ku basketbollisti shkodran Nikolin Arra goditi me grushte gjyqtarin e takimit, Ervis Allaraj, situata në dy kampet ka dalë jashtë kontrollit. Trajneri i Vllaznisë, Bledar Gjeçaj, dhe skuadra dolën të irrituar nga parketi duke protestuar gjykimin. Për pasojë, ata nuk ishin prezent as në ceremoninë e dorëzimit të trofeut. Gjeçaj ka debatuar me tone të ashpra edhe me presidentin e FSHB-së, Avni Ponari, dhe është larguar menjëherë nga palestra sportive e Bathores së bashku me ekipin e tij.
ABDULLA DUSHKU

LIBRI I ARTË


2013- Kamza Basket
2012- Tirana
2011- Tirana
2010- Tirana
2009- Tirana
2008- Tirana
2007- Valbona
2006- Valbona
2005- Valbona
2004- Valbona
2003- Tirana
2002- Dinamo
2001- Tirana
2000- Dinamo
1999- Vllaznia