E Enjte, 19 nëntor 2026
Shqiperia.comPortali shqiptar
Sporti

Hitzfeld provokon: Jemi gati per vershellima nga tifozet shqiptare

Në këtë seksion: Sporti · 8 artikuj ↓
Hitzfeld provokon: Jemi gati per vershellima nga tifozet shqiptare
Otmar Hitzfeld ka shtuar më tepër dozën e provokimeve para ndeshjes mes Zvicrës dhe Shqipërisë, duke deklaruar me siguri se në stadiumin e Lucernës do të ketë vërshëllima të shumta kundër përfaqësueses vendase nga tifozët shqiptarë.

“Kjo është një ndeshje në të cilën duhet të presim vërshëllima. Jam i sigurt se do të vërshëllehemi nga tifozët shqiptarë”, ishin fjalët e Hitzfeld i cili ka zgjedhur që të tregohet agresiv në fjalët e tij në mënyrë që të zgjojë nacionalizmin zviceran dhe që tifozët e skuadrës që drejton të arrijnë të konkurrojnë denjësisht me 6 mijë tifozët shqiptarë që priten në shkallët e stadiumit.

“Vërshëllimat e tyre do të na motivojnë. Sfida jonë është si kombëtare dhe tifozët tanë janë po aq të nevojshëm në këtë ndeshje. I bëj apel të gjithë tifozëve tanë të pranishëm që të na mbështetin të gjithë kohën. Kjo është edhe një sfidë në tribuna”, ishin fjalët e Hitzfeld rreth tifozerisë dhe atmosferës që pret në stadiumin e e Lucernës.

“Shqipëria luan shumë mirë këto sfidë të ngarkuara emocionalisht dhe nuk ka asgjë çfarë të humbë. Kështu duhet të presim që të na vënë nën trysni, sidomos falë mbështetjes së tifozëve”, tha trajneri i përfaqësueses zviverane.

Edhe Granit Xhaka duket se është i bindur që tifozët shqiptarë do të vërshëllejnë çdo prekje topi të shqiptarëve që luajnë për Zvicrën. “Mendoj se publiku do të na provokojë. Jemi me fat që luajmë në Lucernë dhe jo në Bazel. Atje është e sigurt se do të vinin 30 mijë tifozë shqiptarë në stadium”, tha mesfushori shqiptar i Zvicrës.