e mërkurë, 18 nëntor 2026
Shqiperia.comPortali shqiptar
Sporti

Domenek: Anelka vrau kombetaren e Frances

Në këtë seksion: Sporti · 8 artikuj ↓
Domenek: Anelka vrau kombetaren e Frances
Raimond Domenek mendon se Nikolas Anelka ishte personi që “vrau” kombëtaren e Francës e cila mori pjesë në Botërorin Afrikë 2010, në momentin kur ai e shau trajnerin e përfaqësueses. Në ngjarjen që u bë botërisht publike, lojtari e shau rëndë në pushim të ndeshjes me Meksikën, në fazën në grupe të aktivitetit, ndërsa më pas u përjashtua nga kombëtarja.

“Çuditërisht, isha më pak i shokuar nga fyerja sesa nga fakti që mu drejtua me “ti”, që theu barrierat e moshës dhe hierarkisë”, kujton 60 vjeçari në librin e tij “Tout Seul” (I vetëm). “Anelka kishte vrarë grupin”.

Ai gjithashtu akuzoi yllin e Bajern Mynih, Frank Riberi, se sillej keq me lojtarët e tjerë të skuadrës, sidomos ndaj Johan Gurkuf.

“Ai vazhdonte të mbante një sjellje prej VIP-i në grupin e lojtarëve. Me shumë qejf do ta kisha varur nga tavani. I thashë Gurkuf: “Të kam dhënë ty çelësat e skuadrës”. Por menjëherë pashë xhelozinë në sytë e Riberi. Është e sigurt që Riberi nuk e pëlqen Gurkuf. Një lojtar mes atyre që morën pjesë në Euro 2008 më kishte paralajmëruar për këtë sjellje të Frank Riberi”.

Domenek gjithashtu komentoi rreth Samir Nasri, të cilit kohët e fundit iu dha një pezullim nga Federata Franceze pasi fyeu publikisht një gazetar. “Nasri simbolizon llojin e lojtarit që flet pa u menduar”, ishte komenti i ish-trajnerit të përfaqësueses franceze.