Adnan Januzaj, ja si u rrit 'ylli' i Mancesterit
Në këtë seksion: Sporti · 8 artikuj ↓
Prestigjiozja angleze “The guardian” i ka kushtuar një artikull të veçantë ngritjes cilësore të Adnan Januzajt. Gazetari ka intervistuar trajnerin e parë të talentit kosovar, si dhe shefin e akademisë së Anderlehtit, ku ai u rrit si futbollist.
“Më kujtohet ai në fillimet e veta. Nuk kishte kaq shumë shtat, por ishte goxha teknik. E lexonte lojën në mënyrë të atillë që askush tjetër nuk e bënte. Pastaj kishte një këmbë të majtë të fuqishme, aq sa që në atë kohë e dinim se do bëhej një lojtar i madh. Ka qenë një nga fëmijët më të talentuar që kam stërvitur”, – ka thënë trajneri i parë i Januzajt tek Anderlehti, Janik Ferreira, transmeton “Panorama Sport”.
Ky i fundit e ka drejtuar për vite me radhë skuadrën e U-15 të Anderlehtit në Belgjikë, ku edhe u formua si futbollist Januzaj. “Nëse do të duhet ta përkufizoj me pak fjalë, mund të them: klas natyral, talent dhe dashuri për lojën, por për të qenë i sinqertë, askush nuk e kishte menduar se do arrinte kaq shpejt majën e futbollit. U impresionova kur kaloi te Mançester Junajtid, por nuk më shkonte ndërmend që shumë shpejt do të ishte edhe në skuadrën e parë. Kjo është thjesht e jashtëzakonshme. Gjykoj gjithsesi se loja e tij mori trajta shumë herë më pozitive gjatë kohës në Angli”, – ka vijuar Ferreira.
Në pak muaj te Mançester Juanjtid, Januzaj u bë një nga më të mirët e kësaj skuadre, aq sa ra në sy edhe të ish-trajnerit Aleks Ferguson. “Adnan është një lojtar i ekuilibruar. Është vetëm 18 vjeç dhe i duhet ende që të rritet, por ka talent dhe është shumë teknik”, – është shprehur Ferguson. Ndërsa Ferreira, i cili ka qenë edhe trajneri më i ri që ka drejtuar në një akademi në Belgjikë, vetëm 31 vjeç, tregon edhe një tjetër episod për Januzajn. “Ai e adhuron futbollin. Po ju tregoj një rast në 2008-2009, kur ne i luanim ndeshjet të shtunave. Januzaj, natyrisht, ishte gjithnjë titullar. Të dielën unë zakonisht bëja një seancë stërvitore me ata që kishin luajtur më pak ose fare. Por çuditërisht në këto seanca Januzaj nuk mungonte asnjëherë. Unë kam biseduar ndërkaq disa herë edhe me babanë e tij. Është një person i sjellshëm dhe shumë i dhënë pas karrierës së të birit. Nuk mungonte në asnjë seancë stërvitore të Adnanit. Pas çdo ndeshjeje flisnim bashkë dhe ai kishte gjithnjë diçka për të kritikuar tek djali i tij, edhe atëherë kur ai kishte bërë një ndeshje thuajse perfekte. Ai nuk është tipi i babait që lavdëron fëmijën e vet, por e kundërta, kërkon gjithnjë e më shumë prej tij. Dhe kjo besoj se i ka bërë mirë Adnanit”.
Januzaj ka lindur në Bruksel në vitin 1995, nga prindër kosovarë të larguar nga Kosova për shkak të luftës. Ata ishin vendosur në Koekelberg, një nga 19 lagjet e Brukselit. Si lojtar, talenti i Januzajt ra në sy që në moshën 10-vjeçare. Zhon Kindermans, shef i akademisë së Anderlehtit, e kujton kështu Januzajn:
“Ai ishte një djalë i brishtë, me këmbë të holla që nuk të linin përshtypje të madhe. Por kishte një të majtë fenomenale. Tregonte gjithnjë më tepër klas sesa mosha me të cilën luante. Mënyra se si e përkëdhelte topin dhe në të njëjtën kohë e mbronte atë, ishte e jashtëzakonshme. E vetmja dobësi e tij në atë kohë ishte shpejtësia. Por edhe kjo është kompensuar nga fakti që ai arrin të mendojë tri herë më shpejt se të tjerët para tij”. Para se Januzaj të mbushte 16 vjeç, babai i tij, Abedini, refuzoi të nënshkruante një kontratë të rregullt me Anderlehtin, që i siguronte të ardhura dhe një vend titullar në skuadër. Ideja e Abedinit ishte që ta çonte te Mançester Junajtid. Dhe me të drejtë, pasi këtu Adnani, falë talentit dhe punës, arriti që të bindte edhe një trajner të madh si Fergusoni, që e mori në skuadrën e parë. Sa i përket ekipit përfaqësues, Abedin Januzaj nuk e ka lejuar të birin të luajë as me kombëtaret e moshave të Belgjikës, duke sqaruar se ai do të përqendrohet më së pari te karriera në klub. Sakaq, Januzaj kërkohet nga Belgjika, Kroacia, Serbia, Turqia, Anglia, Shqipëria dhe Kosova.
Kjo e fundit pasi ka marrë dritën jeshile nga FIFA për të luajtur ndeshje miqësore ndërkombëtare, me disa kushte, mund të tentojë ta bëjë për vete talentin e Mançester Junajtid, opsion ky që parapëlqehet edhe nga i ati i futbollistit. Përndryshe, opsioni i dytë mbetet pritja deri më 2018-ën për të luajtur më pas për Anglinë.