e mërkurë, 18 nëntor 2026
Shqiperia.comPortali shqiptar
Sporti

Vazhdon drama e Medin Zheges, kthehet ne Shqiperi serish ne gjendje te rende

Në këtë seksion: Sporti · 8 artikuj ↓
Vazhdon drama e Medin Zheges, kthehet ne Shqiperi serish ne gjendje te rende
Medin Zhega, ish-trajneri i kombëtare shqiptare është kthyer në Tiranë. Një avion special nga Kanadaja, pas hemorragjisë cerebrale dhe traumatizimit që pësoi atje muaj më parë, e ka sjellë në Shqipëri, ndërsa është shtruar në reanimacionin e Spitalit Nr.5 të kryeqytetit. Gjithçka në një heshtje të plotë dhe vetëm shkuarja e tre njerëzve të futbollit nga Ministria e Turizmit, Kulturës, Rinisë dhe Sporteve, pikërisht zëvëndësministrit Dashnor Bajaziti, drejtorit të sporteve Vasil Bici dhe specialistit të kësaj drejtorie, Uvil Zajmi, zbardh të gjithë lajmin. Nga Zajmi konfirmohet që gjendja e mjeshtrit Zhega është e rëndë dhe, sipas mjekëve, e parikthyeshme. “Nuk flet – shpjegoi Zajmi – dhe pasi të sheh e të njeh, nis të lotojë ngaqë e ka të pamundur të komunikojë”.

Dhe kjo është keqardhje për të gjithë që, edhe pse ka ardhur në Shqipëri, askush nuk e di se ku dhe si është gjendja e Medin Zhegës, atij që i dha shumë futbollit shqiptar, Vllaznisë e Dinamos. E pas kësaj tresheje të MTKRS-së, i takon shumëkujt prej komunitetit të sportit që të shkojë ta vizitojë Zhegën. Sepse, ndoshta, nesër mund të jetë shumë vonë…/Sport Ekspres