e mërkurë, 18 nëntor 2026
Shqiperia.comPortali shqiptar
Aktualitet

Kukan: Rama eshte karizmatik, Meta, i zoti dhe dinamik

Në këtë seksion: Aktualitet · 8 artikuj ↓
Kukan: Rama eshte karizmatik, Meta, i zoti dhe dinamik

Kryeministri i ri Edi Rama  mund të jetë mbresëlënës në negociata, kështu  shprehet kryesuesi i delegacionit të Parlamentit  Europian, Eduard Kukan, në një intervistë ekskluzive për gazetën “Shekulli” të  dhënë në Bruksel gjatë një takimi me  gazetarë nga vendet që aspirojnë të  anëtarësohen në BE. Europarlamentari thotë se lideri socialist ka qenë  gjithnjë tepër kritik rreth kësaj qeverie,  ndërsa tani ka mundësi të tregojë se  si do të punojë si kryeministër. Kukan  shpreson nga kryeministri Rama që të  realizojë ato çka premtoi: klimë politike të re e pozitive. “Është i aftë, por  vetëm realiteti do ta vërë në provë”, thekson Kukan .

Mendoni se Shqipëria i ka plotësuar  standardet e zgjedhjeve?

Deri tani po. Ne ishim aty në ditën e  votimit dhe mund të them se në tërë-si ishte një proces normal, përveç incidentit tragjik në Laç dhe disa parregullsive të karakterit teknik. Edhe  vëzhguesit ndërkombëtarë e vlerësuan ditën e zgjedhjeve si normale. Pati  disa vonesa në procesin e numërimit,  por deklaratat e përfaqësuesve politikë ishin pozitive. Kryeministri Berisha  e pranoi humbjen, ndërsa kryeministri i ardhshëm Edi Rama dha një mesazh shumë të rëndësishëm për popullin e tij, se njerëzit duhet të jenë të  qetë se kushdo që është i kualifikuar për  një post të caktuar në administratën  shtetërore do të mbetet aty. Kështu  që ne këtu në Parlamentin Evropian  besojmë se kjo është rruga e duhur dhe  shpresojmë që kalimi i pushteteve do  të bëhet normalisht, e po ashtu edhe  formimi i Parlamentit dhe Qeverisë së  re në shtator. Nëse e gjitha kjo vazhdon të shkojë sikurse deri tani, ne kemi besim se Shqipëria do të lëvizë më  shpejt në rrugën e integrimit evropian.

Komisioni Qendror i Zgjedhjeve veproi me katër anëtarë nga  shtatë...

Kjo është diçka negative, e cila është  përfshirë në raportin e vëzhguesve  ndërkombëtarë, sikurse edhe fakti që  fatkeqësisht fondet publike u përdorën  për partitë politike. Kjo nuk duhet të  ndodhte. Këto ndodhën që para zgjedhjeve, por falë Zotit procesi ishte i qetë  dhe tani i kemi të gjitha shpresat se  Shqipëria do ecë më tej drejt integrimit evropian.

A mendoni se qeveria e re e z. Rama  dhe z. Meta do jetë e suksesshme,  duke qenë se të dy ata janë udhëheqës të fortë?

Hapi i radhës është gjithnjë më i  vështirë, por një udhëheqës i madh  duhet të vendosë përparësi. Është një  partner i madh dhe një i vogël dhe  ne shpresojmë që ata të punojnë së  bashku për të mirën e vendit. Na mbetet thjesht të shpresojmë që ata të sil-len në mënyrë të përgjegjshme, nevojitet përgjegjësi politike nga të dy.

Si e shikoni dorëheqjen e z. Sali  Berisha nga Partia Demokratike?

Mendoj se është një hap logjik dhe i  arsyeshëm, sepse një udhëheqës politik që e drejton partinë dhe ajo humbet  me një diferencë kaq të madhe, duhet  të mbajë përgjegjësi për këtë. Mendoj  se akti i tij i dorëheqjes duhet vlerësuar, e tillë duhet të jetë kultura politike.

Sa mundësi ka Shqipëria që ta marrë Statusin e vendit kandidat në  dhjetor?

Nëse gjërat shkojnë siç kanë shkuar  deri tani, mundësitë janë reale. Por,  duhet të presim e të shohim si do vijojë më tej.

Personalisht, si e vlerësoni z.  Rama?

E njoh z. Rama, jemi takuar shumë herë.  Është shumë karizmatik dhe mund të  jetë mbresëlënës në negociata. Ka qe-në gjithnjë tepër kritik rreth kësaj qeverie, përherë ka qenë i pakënaqur për  punën e saj. Tani ka mundësi të tregojë  se si ai do punojë si kryeministër. Unë  thjesht shpresoj që ai të realizojë ato  çka premtoi: klimë politike të re e pozitive. Është i aftë, por vetëm realiteti do  ta vërë në provë.

Z. Meta?

Z.Meta është gjithashtu një politikan i ri  e shumë dinamik. Personalisht mendoj  se është shumë i zoti në menaxhimin e  partisë së tij. Besoj se ai do ta përdorë  pozitën e tij për ta çuar përpara zhvillimin evropian të Shqipërisë.

Po z. Berisha, 21 vjet në politikë e  katër të tjera si deputet...?

Ai është një politikan me përvojë të  madhe, ishte kryeministër për tetë  vjet, një kohë e gjatë. Është dinamik  e me eksperiencë, sikurse duhet të jenë politikanët, por zgjedhjet treguan  që njerëzit nuk kishin më besim tek ai.  Mund të ishte sjellë ndryshe, mund të  kishte krijuar probleme pas humbjes,  por nuk e bëri. Dha dorëheqje, çka ishte  një lëvizje politike e mirë nga ana e tij. Partitë akuzojnë njëra-tjetrën  për korrupsion, por askush nuk  dënohet... Kjo është gjë e keqe, sepse rastet e  korrupsionit duhet të hetohen objektivisht dhe drejt, dhe kushdo qoftë  duhet të përballet me ligjin në mënyrë  të barabartë.