e mërkurë, 18 nëntor 2026
Shqiperia.comPortali shqiptar
Sporti

De Biazi: Me jepni kohe per rinovimin

Në këtë seksion: Sporti · 8 artikuj ↓
De Biazi: Me jepni kohe per rinovimin

Një intervistë ne avion. Pikërisht në momentin që çarteri i linjës Rejkjavik Tiranë ishte mbi Paris. Atje ku Shqipëria me apo pa De Biazin do provojë të shkojë pas tre vitesh. “Kemi ndërtuar një skuadër nga zero. Jemi gati për edicionin e ardhshëm”. Flet në vetën e parë shumës. Shumës, por në vetën e parë. Kjo do të thotë që kontrata do të firmoset? “Duka ka thënë deri në fund të shtatorit. E po do të më jepni pak kohë të mendohem disi”. De Biazi në një rrëfim pothuaj të sinqertë.

24 orë pas humbjes cila është ndjesia që po përjeton de Biazi?

Ok, jeta vazhdon, por realisht zhvilluam një ndeshje nën nivelin tonë. Prisja diçka më shumë nga skuadra, patjetër që prisja më shumë. Të gjithë besoj prisnin diçka më shumë. Por futbolli është kështu. Ndodhesh në një ditë të keqe. Ndodhi këtë të martë pikërisht në një ndeshje vendimtare.

A ishte përgatitur ndeshja si duhet?

Besoj që po, jam i bindur. Ndoshta unë mendova se kjo skuadër ishte rritur aq sa duhet për të përballuar ndeshje kaq decisive. Këtë e thashë dhe në konferencë për shtyp. Për fat nuk ishte rritur aq sa duhej. Kemi ende shumë punë për të bërë.

I marrim gjërat me rradhë. A do të ishte më mirë nëse Lila do të luante në vendin e tij të zakonshëm?

Mendova që do ishte më efikas në të majtë pas mungesës së Agollit. Do ta ribëja si zgjedhje. Vërtet dy golat erdhën nga ai krah por realisht mendoj se ai është një lojtar që jep gjithcka dhe këtë bëri dhe këtë ndeshje megjithëse nuk luan në rolin e tij natyral.

Cili është komenti juaj për perfomancën e Dallkut. Ai është gjithnjë e më shumë i kontestuar në Shqipëri?

Ai dhe të paktën 5-6 lojtarë ndoshta nuk ishin në një ditë të mirë. Megjithatë ai është pjesë e organikës.

A jeni në dijeni të faktit që kemi vetëm tre lojtarë nëpër krahë. Pse nuk është bërë më shumë për të kompensuar mungesat?

Hysaj është një lojtar i ri dhe me potencial por është shumë i ri ta aktivizoja nga minuta e parë.

Arapi mund të ish një zgjidhje?

Në të ardhmen mund të ketë hapësira dhe për të.

A kemi eliminuar disa lojtarë si përshembull Vangjelin?

Nuk bëj komente më për këtë çështje.

A ka një çështje Bulku në skuadër. Lojtari që luajti rregullisht në këto dy vite me ju befas e gjen veten në stol?

Shikoni, ai është një lojtar shumë i rëndësishëm. Zgjodha ta zëvendësoja në Slloveni dhe ju e patë që loja ndryshoi. Mendoj realisht që është i domsdoshëm për ekipin. Është një trajner në dhomat e zhveshjes. Rastet nuk gjykohen nga vendime në ndeshje të caktuara.

Cana është një tjetër temë diskutimi në Shqipëri. A është në 100% të forms së tij në përfaqësueses?

Padiskutim që po, është një lider dhe projekti i kësaj skuadre vërtitet rreth tij. Është një kapiten që e ka zgjedhur populli dhe patjetër që ne bazohemi te ai.

Ndoshta ka futbollistë në ekip që nuk e pëlqejnë faktin që ai është kapiten?

Unë nuk besoj se kapiteni është një gjë që dhurohet. Nëse është i tillë besoj se e meriton. Pastaj ndokush nga zilia ndonjë fjalë më shumë dhe mund ta thotë.

Në verën e 2012-ës kishim disa sulmues aq sa ishit në siklet për të gjetur zgjedhje. Tani shënojmë gjithnjë e më pak?

Sadiku ka pasur probleme me skuadrën pothuaj gjatë gjithë verës, ndërkohë që dhe Bogdani gjithashtu nuk ka gjetur ende një skuadër. Këto dy lojtarë na kanë penalizuar disi sepse do kishim më shumë alternativa.

A duhet besuar më shumë te Bala?

Është një lojtar të cilin e kam observuar me kujdes dhe besoj do ta shoh sërish se çfarë është duke bërë në Poloni.

Hyjmë te tema konkrete që i intereson gjithë shqiptarëve. Çfarë do bëhet me rinovimin tuaj?

Patjetër që ky është vullneti i Dukës, është ai i cili vendos për një gjë të tillë.

Vetëm 3 orë më parë Duka tha që ishte plotësisht i interesuar që të vazhdonit punën në përfaqësuese dhe se kontrata dhe oferta e bërë është e vlefshme?

Ok, por duhet të më jepni kohë për një përgjigje.

Sa, sepse FSHF mendon që të rinovoni në mënyrë që të nisë puna për edicionin e ardhshëm dhe që në ndeshjet e Zvicrës dhe Qipros të keni një kontratë për të punuar i qetë. Ata duan që trajneri i këtyre dy ndeshjeve të jetë dhe trajneri që do trajnojë skuadrën sezonin e ardhshëm?

Patjetër që deri atëherë do të kemi marrë një vendim.

A është e vërtetë që keni marrë një ofertë të rëndësishme në verë?

Po, nga Olimpiakos.

Pse nuk pranuat?

Isha nën kontratë dhe isha pjesë e një projekti të rëndësishëm.

Jeni i zhgënjyer?

Zhgënjim është fjalë e madhe.

Cili është pengu i këtij edicioni?

Ndeshja kundër Sllovenisë në Lubjanë. Sa për Islandën mendoj se u mundëm paq edhe sepse ata ishin më lart se ne fizikisht.

Nëse do të rinovoni sa shanse kemi të ëndërrojmë sërish?

Nëse rinovohet do të ndërtojmë një skuadër dhe më solide për Francë 2016. Kemi gjetur lojtarë të rëndësishëm.

Kace është njëri prej tyre?

20 vjec luan në Champions League me Paok. Çfarë duhet më shumë për tu bindur. Ka aftësi shumë të mira.

Pse e injoroni kampionatin shqiptar?

Disa nga më të mirët janë këtu. Do të doja përshembull dhe Orelesin por ai nuk është shqiptar.

Megjithatë ju nuk jeni shumë prezentë nëpër tribuna?

Do të shoh nga afër derbin Partizani- Tirana. Shpresoj ta shijoj plotësisht si ndeshje.

Përfundimisht po apo jo i Shqipërisë në të ardhmen?

Të shohim, përgjithësisht jemi pozitivë, por asnjëherë nuk i dihet. Megjithatë ne punuam dhe po punojmë për një skuadër të së ardhmes dhe e bëmë këtë gjë nga zero. Kjo më bën krenar.

Çfarë mund të dhe duhet të presim në dy ndeshjet e fundit?

Të gjithë Shqipërinë e këtij sezoni përveç ndeshjes me Islandën. Ne mund t’i fitojmë dhe humbasim të dyja ndeshjet, por do të jemi aty dhe do luftojmë për çdo top./Sport Ekspres