e mërkurë, 18 nëntor 2026
Shqiperia.comPortali shqiptar
Sporti

Bulku: Te mbledhim forcat dhe te shikojme perpara

Në këtë seksion: Sporti · 8 artikuj ↓
Bulku: Te mbledhim forcat dhe te shikojme perpara

Ervin Bulku në dy ndeshjet e fundit është zëvendësuar nga trajneri De Biazi, ndoshta edhe nga fakti që nuk u përshtat siç duhej me skemat e italianit. Më shumë se për veten, Bulkut i vjen keq që skuadra në këto dy sfida vendimtare nuk mori asnjë pikë dhe kështu “Brazil 2014”, mbetet vetëm një ëndërr. Në një prononcim për “Sport Ekspres”, pas sfidës së djeshme një nga “veteranët” e përfaqësueses sonë, Ervin Bulku u shpreh: “Jam profesionist dhe nuk bëj polemika me trajnerin. Kështu që e pranoj stolin dhe për mua nuk ka asnjë problem. Unë kam 12 vite që jam pjesë e skuadrës përfaqësuese dhe nuk kam bërë kurrë polemika, qoftë me trajnerët apo shokët e skuadrës”, tha fillimisht “Uku”.

E ardhmja- “Natyrisht që kemi pak pikë dhe jemi në vend të pestë. Ne duhet që të mbledhim forcat dhe të marrim sa më shumë pikë në ndeshjet e mbetura, sepse nuk është njësoj si të mbyllësh grupin me 10 apo me 13 e 16 pikë. Ne humbëm një shans të madh dhe nuk e di nëse do e kemi sërish një të tillë në të ardhmen. Besoj se me kualitetet që kemi, në Tiranë mund të fitojmë me Zvicrën. Nuk jam unë ai që mund të them se kush gaboi, për këtë mund të flasë trajneri apo specialistët”, shtoi Bulku gjatë prononcimit.

Tifozët- Në fund Bulku ndien keqardhje për mbështetjen e madhe që skuadra pati nga tifozët, por këta të fundit janë zhgënjyer shumë me dy humbjet e kuqezinjve. “Më vjen shumë keq për tifozët që na kanë mbështetur shumë dhe kanë besuar tek ne. Kemi humbur dy ndeshje me Islandën, por ndryshe nga dje në sfidën e parë në Tiranë jemi mundur për çështje fati sepse kemi luajtur shumë mirë”, u shpreh mesfushori kryeqytetas.