e mërkurë, 18 nëntor 2026
Shqiperia.comPortali shqiptar
Sporti

Barcelona ne histori, me 11 lojtare nga Akademia ne fushe

Në këtë seksion: Sporti · 8 artikuj ↓
Barcelona ne histori, me 11 lojtare nga Akademia ne fushe
Barcelona ka çuar në 11 pikë diferencën me Real Madrid në renditjen e kampionatit, duke treguar një provë force me fitoren 4-0 ndaj Levantes. Suksesi i katalanasve është shumë më domethënës, pasi në fushë kanë rreshtuar si titullarë për herë të parë në historinë e tyre 11 lojtarë që kanë dalë nga “La Masia”, akademia e famshme e tyre që prodhon talente të panumërt.

Në një ndeshje të dominuar nga ekipi katalanas, gjithçka është vendosur në fillimin e pjesës së dytë, kur brenda më pak se 20 minutash janë shënuar të katër golat. Andres Iniesta ka qenë i shkëlqyer me pasimet për dy golat e  Mesit dhe golin e Fabregas, ndërsa ka gjetur edhe vetë rrugën e rrjetës.

Ndërkohë, Mesi me dygolëshin e tij të radhës, ka çuar në 82 shifrën e golave të shënuar në vitin kalendarik 2012, vetëm 3 larg rekordit të Gerd Myler që duket se nuk do të vonojë të thyhet përballë talentit argjentinas.

Atletiko Madrid vazhdon të mbetet ndjekësi më i afërt i katalanasve, edhe pse drejtuesit e kësaj skuadra insistojnë se nuk luftojnë për titull por vetëm të sigurojnë pjesëmarrjen në Ligën e Kampioneve në sezonin e ardhshëm. Këtë radhë, skuadra e Simeones ka shkatërruar Valencian me rezultatin 4-0, duke bërë të qartë se dëshiron të fitojë të ashtuquajturin “La Liga tjetër”, për t’u renditur në vendin e tretë pas Barcelonës e Real Madrid, ndonëse këta të fundit aktualisht janë poshtë tyre në renditje./lajmeshqip