e mërkurë, 18 nëntor 2026
Shqiperia.comPortali shqiptar
Sporti

Azdren Llullaku braktis Shqiperine per Kosoven

Në këtë seksion: Sporti · 8 artikuj ↓
Azdren Llullaku braktis Shqiperine per Kosoven

U tha se trajneri De Biazi do të bënte një mbledhje urgjente me lojtarët kosovarë, me qëllim që të evitonte rrjedhje të tjera nga skuadra që drejton, por duket se rrugën e Samir Ujkanit pritet ta ndjekë edhe Azdren Llullaku. Lojtari, që më parë u grumbullua për Shqipërinë, është i gatshëm ta lërë Kombëtaren kuqezi për miqësoret e Kosovës. Ai thotë për gazetën “Arena” se pret ftesë nga trajneri i Kosovës, Albert Bunjaku. Sulmuesi, i cili ka qenë i grumbulluar edhe me Kombëtaren e Shqipërisë, por nuk ka luajtur, ka thënë qartazi se po mendon vetëm për Kosovën. Lojtari nga Istogu, që aktivizohet me Gaz Metan të Rumanisë, tregon edhe për emocionet që i solli miqësorja e parë e Kosovës. “E kam ndjekur gjithë ndeshjen mes Kosovës dhe Haitit. Ishte një atmosferë tejet e mirë dhe në atë moment më është shfaqur një dëshirë tejet e madhe që të jem i pranishëm para gjithë atyre tifozëve”, – u shpreh sulmuesi.

Ftesa

Llullaku i bën me dije trajnerit të Kosovës se mund të llogarisë për ndeshjen e radhës, që përfaqësuesja pritet ta luajë me Turqinë në maj. “Dëshira është e madhe që të jem në fushë në takimin ndaj Turqisë. Unë do të kthehem në formën më të mirë timen dhe tani mbetet në dorë të trajnerit Albert Bunjaku nëse do të më ftojë apo jo. Gjithçka mund t’ju them, është se Kosova le të llogarisë edhe shërbimet e mia”, – u shpreh Llullaku. Në rast se do t’i vijë ftesa nga Kosova, ai do të njoftojë edhe Federatën Shqiptare të Futbollit. “Nëse vjen ftesa nga Kosova, do i tregoj Shqipërisë që po kthehem të luaj për vendlindjen dhe do t’i falënderoj që kanë investuar në mua. Dëshira ka qenë e madhe të jem edhe ndaj Haitit, mirëpo besoj se ndeshja ndaj Turqisë do të jetë edhe më madhështore”, – vijoi Llullaku. Para tij, të njëjtën rrugë e ndoqën edhe Samir Ujkani e Loret Sadiku, që më parë ishin grumbulluar me Shqipërinë, por që për mbrojtësin e Helsingborgut thuhet se do t’u rikthehet kuqezinjve. Pjesa e dytë e kampionatit në Rumani ka filluar këtë muaj dhe Azdreni beson se do të rikthehet në formën e vitit të kaluar, kur ishte ndër sulmuesit më të spikatur në kampionatin rumun. “Tani e kemi filluar kampionatin dhe jam duke punuar shumë për t’u rikthyer në formën më të mirë të mundshme. Me punë arrihet gjithçka dhe besoj se edhe forma ime e mirë do të vijë”.

Shqipëria

Lojtari ka deklaruar se është në kontakt të vazhdueshëm me ndihmëstrajnerin e Kombëtares shqiptare. “Për herë të parë u grumbullova nga Shqipëria në ndeshjen ndaj Norvegjisë, ku qëndrova në pankinë. Pastaj pata disa probleme me lëndime dhe më nuk jam ftuar, por që jam në kontakte të vazhdueshme me ndihmësin e De Biazit, Paulo Tramexanin, i cili më ka bërë me dije se më llogarisin dhe mua, sapo të kthehem në formën më të mirë”, – përfundoi sulmuesi 26-vjeçar. Azdreni, në 19 paraqitje këtë sezon me Gaz Metanin, ka arritur të shënojë tre gola, ndërsa ka bërë edhe katër asistime për bashkëlojtarët e tij.