E Enjte, 19 nëntor 2026
Shqiperia.comPortali shqiptar
Aktualitet

Treqind intelektuale kerkojne gjykim te paanshem te Haradinajt

Në këtë seksion: Aktualitet · 8 artikuj ↓
Treqind intelektuale kerkojne gjykim te paanshem te Haradinajt
Një letër e firmosur nga 300 intelektualë të Kosovës i është dërguar të mërkurën kryetarit të Tribunalit të Hagës, Patrik Robinson, në të cilën i jepet mbështetje liderit të Aleancës për Ardhmërinë e Kosovës, Ramush Haradinaj. Në letër shprehet edhe shqetësimi për ngecjen dhe prolongimin e procesit gjyqësor të Haradinajt dhe dy bashkëluftëtarëve të tij, Idriz Balajt dhe Lahi Brahimajt.

Shefi i Departamentit të Historisë në Fakultetin Filozofik, profesori Muhamet Mala, ka thënë se nga kryetari Robinson është kërkuar që rigjykimi i pjesshëm i Haradinajt, i cili pritet të fillojë më 17 gusht, të jetë i shpejtë, i drejtë dhe i paanshëm. Sipas profesorit Mala, letra që i është dërguar kryetarit të Tribunalit, nuk është ngritur mbi kriteret partiake, por ka një bazë të gjerë intelektuale.

“Ne profesorët e UP-së, akademikët dhe intelektualët nuk mund ta kuptojmë sesi është e mundur që një njeri i liruar një herë nga gjyqi i Hagës, të gjykohet përsëri për të njëjtat vepra për të cilat më parë është shpallur i pafajshëm. Ku është drejtësia pas kësaj”, ka thënë Mala, duke cituar pjesë të përmbajtjes së letrës që i është dërguar kryetarit të Tribunalit, Patrik Robinson. Në letër thuhet se mbajtja e Haradinajt në Hagë përbën një hendikep edhe për proceset e shtetndërtimit.

Anëtari i Akademisë së Shkencave dhe të Arteve të Kosovës, Rexhep Ferri, në emër të intelektualëve ka kërkuar që të flasë drejtësia në Hagë, i bindur se ajo është në anën e Haradinajt.

“Është e palogjikshme që Ramush Haradinaj të jetë në një qeli në Hagë, afër Ratko Mlladiqit. Drejtësia botërore dhe evropiane duhet ta thotë fjalën e vet ashtu siç duhet, ngase me këtë e nderon veten, por edhe ne”, ka thënë Ferri.

Ndërkaq, pedagogia në Fakultetin Juridik, Hava Bujupi, ka thënë se përkushtimi ndaj Haradinajt i është shtuar edhe më tepër, ngase gjer më tani janë dëgjuar pak zëra të sinqertë, që do t’i dilnin në krah dhe do ta mbronin atë.

“Haradinaj e ka merituar dhe e meriton të bëhet edhe më tepër për të”, ka thënë Bujupi.

Akuzat për krime lufte ndaj Haradinajt u ngritën në mars të vitit 2005, kur ai ishte kryeministër i Kosovës. Pas gjykimit, Haradinaj më 2008 u shpall i pafajshëm. Mirëpo, në korrik të vitit 2010 ai ftua sërish për rigjykim të pjesshëm.