Sot, Presidenti Nishani ftoi në një takim konsultativ përfaqësues nga të gjitha grupet parlamentare për të diskutuar për përzgjedhjen e anëtarëve të Komisionit të Emërimeve në Drejtësi (KED). Zoti Nishani u shpreh se nuk ka bazë ligjore për të nisur formimi i këtij komisioni.
Më poshtë Exit sqaron se çfarë është KED dhe se ku qëndron problemi sipas Presidentit Nishani.
Çfarë është KED?
Me miratimin e ndryshimet kushtetuese në 21-22 korrik, një prej institucioneve të reja që u krijua ishte Këshilli i Emërimeve në Drejtësi.
KED do të bëjë verifikimin, vlerësimin e kritereve profesionale e morale të kandidatëve për anëtarë të Gjykatës Kushtetuese dhe për lnspektor të Lartë të Drejtësisë.
Ky komisioni përbëhet nga 9 anëtarë, të cilët shërbejnë për një mandat një vjeçar, nga 1 janari deri më 31 dhjetor të vitit përkatës.
KED do të përbëhet nga 2 anëtarë nga gjyqtarët e Gjykatës Kushtetuese, 1 anëtar nga gjyqtarët e Gjykatës së Lartë, 1 anëtar nga prokurorët e Prokurorisë së Përgjithshme, 2 anëtarë nga gjyqtarët dhe 2 nga prokurorët e apelit, dhe 1 anëtar nga gjyqtarët e gjykatave administrative.
Ata gjyqtarë apo prokurorë, ndaj të cilëve është dhënë masë disiplinore nuk mund të marrin pjesë në shorte. Kriteret e tjera për anëtarët rregullohen me ligj të veçantë.
Anëtarët zgjidhen me short nga Presidenti i Republikës.
Presidenti zhvillon shorteun për anëtarët e KED-së nga data 1 deri në 5 dhjetor të çdo viti. Më pas anëtarët e përzgjedhur fillojnë punën në janar të vitit të ardhshëm.
Shqetësimi i Presidentit Nishani
Përveç neneve që shpjegojnë si do të funksionojë sistemi i ri i drejtësisë, kushtetuta e re përmban dhe nene që shpjegojnë se si do të veprohet gjatë periudhës tranzitore deri në ndryshimin e institucioneve të sistemit të drejtësisë
Sipas nenit 179/11 (nen për periudhën tranzitore), Presidenti duhet ta zhvillojë shorteun për anëtarët e KED-së brenda pesë ditëve pasi ndryshimet kushtetuese hyjnë në fuqi. Ndryshimet kushtetuese hyjnë në fuqi më 11 gusht, ndaj shorteu duhet të zhvillohet brenda datës 16 gusht.
Shqetësimi i Presidentit Nishani lidhet me faktin se ligji përcakton që kriteret mbi të cilat do të caktohen gjyqtarët dhe prokurorët që mund të marrin pjesë në shorte rregullohen nga një ligj i veçantë, që ende nuk është miratuar nga Kuvendi. Kujtojmë se shtatë projektligjet që shoqërojnë ndryshimet kushtetuese dhe rregullojnë institucionet e reja janë ende në diskutim në Komisionin e Posaçëm të Reformës.
Nëse Presidenti i Republikës nuk i përzgjedh anëtarët brenda 16 gushtit, kjo kompetencë i kalon Kryetarit të Kuvendit. Ky i fundit duhet t'i zgjedhë ata me short brenda dhjetë ditëve nga hyrja në fuqi e këtij ligji.
Deri më tani, ende nuk ka reagim nga PS, PD e LSI lidhur me këtë shqetësim të Zotit Nishani.
