“Kërkesa për një ligj sa më cilësor nuk duhet të bëhet alibi për zvarritjen në pafundësi të këtij ligji sepse kjo situatë kaotike dëmton rëndë bizneset e turizmit”, tha Gërxhani.
Ndër sfidat e vitit 2011, Gërxhani shtoi gjithashtu përcaktimin e një plani masash për përballimin e konkurrencës, nga e cila, vuri në dukje ai, jemi më pak të mbrojtur pas liberalizimit të vizave.
Drejtori i Programit EDEP, Erik Ruh, i cili asiston shoqatën shqiptare të turizmit, tha se sektori i turizmit ka ndikuar në rritjen me 20% të numrit të vizitorëve si dhe 4.7% të Prodhimit të Brëndshëm Bruto në vitin 2010.
Por ai theksoi se “nuk ka arsye për t’u kënaqur, pasi ende ka probleme, si mbetjet urbane në vëndet turistike, mungesa e përvojës së shumë bizneseve, cilësia e shërbimit, etj”, duke shtuar se do të vazhdojë të mbështesë ATA në zgjidhjen e problemeve. Nga ana e tij, Drejtori i USAID në Shqipëri, Victor Luboyeski, tha se objektivat e kësaj organizate për Shqipërinë janë përmirësimi dhe promovimi i imazhit të Shqipërisë, përmirësimi i marketingut dhe shitjeve në bizneset e turizmit si dhe bashkëpunimi me partnerë të tjerë.
Luboyeski tha gjithashtu se do të inkurajojnë bujtinat e vogla në veri të Shqipërisë për të promovuar këtë zonë dhe do të mbështesin financiarisht përfshirjen e Shqipërisë në faqen zyrtare të internetit të National Geographic. Ministri i Turizmit, Kulturës, Rinisë dhe Sporteve, Ferdinand Xhaferaj, tha se zhvillimi i turizmit të qëndrueshëm dhe harmonik vazhdon të jetë prioritet i programit të Qeverisë Shqiptare.
“Në funksion të këtij prioriteti axhenda jonë synon cilësinë dhe vetëm cilësinë”, tha Xhaferaj.Kjo është konferenca e tretë e ATA që nga themelimi i saj në 2008.