Ja cilet jane 49 ambasadoret shqiptare ne bote

Aktualisht, Shqipëria njihet mirë nga 49 vende të botës, për shkak të përfaqësuesve tanë atje, të cilat krijojnë marrëdhënie më të afërt mes palëve. Fjala më e fundit për shtimin e diplomatëve është thënë jo më larg se në datën 3 të këtij muaji, ku Këshilli i Ministrave miratoi vendimin për hapjen e 6 ambasadave të reja.

Përfaqësitë diplomatike

Gjashtë përfaqësi diplomatike do ti shtohen shtetit shqiptar në botë e gjashtë të tjera janë në negocim e sipër dhe do të bëhen fakt konkret pas pak kohësh. Qeveria është përkushtuar në hapjen e ambasadave në sa më shumë shtete të botës me qëllim koordinimin e marrëdhënieve dhe ruajtje e tyre me këto vende. Vetë kryeministri Sali Berisha, deklaroi gjatë mbledhjes së qeverisë, me 3 mars, se Shqipëria ka nevojë për një përfaqësim të gjerë në botë. Deri tani numërohen plot 49 ambasadorë dhe konsuj, duke i shtuar dhe 6 të fundit, të miratuar në mbledhjen e Këshillit të Ministrave, numri i tyre shkon në 55.

Detyrat e ambasadorëve

Duke u bazuar në nenin 16 të ligjit nr.9095, datë  3.7.2003, “Për shërbimin e jashtëm të Republikës së Shqipërisë”, “Misioni diplomatik i Republikës së Shqipërisë ushtron funksionet në përputhje me Konventën e Vjenës për Marrëdhëniet Diplomatike të vitit 1961, dhe ka për detyrë të: përfaqësojë Republikën e Shqipërisë në shtetin pritës ose në organizatat ndërkombëtare; të mbrojë në shtetin pritës interesat e Republikës së Shqipërisë dhe të shtetasve ose personave juridikë të saj, brenda kufijve të lejuar nga e drejta ndërkombëtare; të nxisë zhvillimin e marrëdhënieve politike, ekonomike, kulturore, arsimore, shkencore, teknologjike, të informacionit, diplomatiko-konsullore dhe në çdo fushë tjetër ndërmjet Republikës së Shqipërisë dhe shtetit pritës, në një frymë miqësore e bashkëpunimi; t'i japë të dhëna Ministrisë së Punëve të Jashtme për zhvillimet ekonomike, politike dhe sociale të shtetit pritës dhe për veprimtarinë e organizatave ndërkombëtare, pranë të cilave është akredituar; të bashkëpunojë me delegacionet e Republikës së Shqipërisë në bisedimet që zhvillohen në shtetin pritës dhe të marrë pjesë në bisedime me qeverinë e shtetit pritës në përgatitjen për nënshkrim të marrëveshjeve ndërkombëtare, si dhe në veprimtarinë e konferencave ndërkombëtare. Ambasadorët emërohen dhe lirohen nga Presidenti i Republikës, me propozimin e Kryeministrit. Ministri i Punëve të Jashtme i paraqet Kryeministrit propozimet përkatëse për emërimin dhe lirimin e ambasadorëve. Përpara emërimit të ambasadorit nga Presidenti, Komisioni i Kuvendit që mbulon politikën e jashtme, organizon seancë dëgjimore me kandidatin për t'u emëruar ambasador. Ndërkohë me 20 për qind mund të emërohen në këto poste edhe  ish-anëtarë të Këshillit të Ministrave, ish-deputetë, personalitete të fushave të ndryshme, të cilët plotësojnë kriteret e përcaktuara në këtë ligj.