Ngërçi i krijuar në Itali për zgjedhjen e emrit të trajnerit të ri duket se ka prekur edhe stolin e Lacios. Pas takimit që Çezare Prandeli zhvilloi të hënën me presidentin e Lacios, Lotiton, bisedimet kanë vijuar me përfaqësues të tjerë të klubit, por ende nuk ka një firmë zyrtare.
Mediat italiane shkruajnë se Prandeli ka zhvilluar sot një bisedë telefonike me drejtorin Sportiv të Laciso, Igli Taren, lidhur me projektin e tij për çështje teknike. Mes Prandelit dhe klubit thuhet se ka marrëveshje për pagën prej 1,8 milionë eurosh në vit, por kontrata ende nuk po firmoset.
Portali "cittaceleste" ngre pikëpyetje se përse nuk ka asgjë konkrete, duke e lidhur këtë me bisedimet për trajnerin që do të zërë vendin e Antonio Konten pas Europianit.
Këtë të mërkurë disa media prestigjioze në Itali shkruajnë se zgjedhja e trajnerit të 'axurrëve' është kthyer në një "çështje kombëtare", duke përfshirë edhe reagimin e kryeministrit italian, Mateo Renzi.
Për këtë të fundit thuhet se dëshiron që në krye të ekipit të zgjidhet Montela dhe jo Ventura, paçka se kjo u përgënjeshtrua më pas nga kreu i qeverisë.
Ndërkaq, portali 'Cittaceleste' flet për një takim mes Venturës dhe presidentit të Lacios para një jave dhe ngre pikëpyetje nëse mungesa e firmës së Prandelit varet nga zgjedhja e trajnerit të ri të Italisë.