Tufa 20 vjet krijimtari

"Fryma mbi ujëra" titullohet libri i prezantuar dje në sallën e kinemasë në Qendrën Ndërkombëtare të Kulturës "Arbnori". Është një përmbledhje poezish të shkëputura nga vëllimet "Aty te portat Skee" (1996), "Rrethinat e Atlantidës" (2002), "Avangardë engjëjsh" (2005). Në praninë e të ftuarve, Tufa nuk mund të anashkalonte e të mos fliste pak për poezinë, për këtë gjini letrare, jo fort të dashur për tregtarët, që duket sikur humb terren nga dita në ditë karshi gjinive të tjera, por prej së cilës nuk mund të heqësh dorë.

Për aq sa mund të shpjegohej me fjalë krijimtaria e tij ka si nxitje momentin, mendimin dhe gjuhën. "E quaj veten poet filozof, edhe pse nuk kam asnjë doktrinë për t'ju paraqitur", - shprehet Tufa, teksa thotë duke qeshur se e ndjen veten më të zot në të shkruar se në të folur. Si për t'i bërë parapritë lexuesit, i cili zakonisht pret gjëra të mëdha, thotë se nuk është tipi i poetit që reagon ndaj ngjarjeve të ditës, ndaj problemeve sociale, ndaj padrejtësive, madje thotë hapur se nuk e pëlqen këtë lloj të shkruari as tek të tjerët. Sipas tij kjo lloj gjuhe, poezia, duhet të mbetet sa më e pastër dhe e pacënuar. Pas kësaj ligjërate, u lexuan disa poezi të zgjedhura nga përmbledhja e prezantuar. Duke e konsideruar këtë botim si një libër të ri, i cili ende nuk ka depërtuar tek lexuesi, Tufa ka preferuar që të mos flitet për "Frymën mbi ujëra" nga të pranishmit, siç ndodh rëndom nëpër prezantime.

 
A. M. : Gazeta Shekulli