"Komiteti i Nobelit i Institutit Karolinska bën të ditur, se çmimi i sivjetëm Nobel për mjekësinë dhe fiziologjinë u jepet së bashku Mario Capecchi-it, Martin Evands-it dhe Oliver Smithies-it"
Dy amerikanë nga SHBA dhe një britanik e ndajnë mes tyre çmimin e shoqëruar me 1,1 milionë Euro. Në mënyrë tradicionale, fillimisht informohen me telefon marrësit e çmimit, përpara se pas kësaj komiteti të dalë në publik me këtë lajm.
Reagimi i parë i 82 vjeçarit Oliver Smithies:
"Unë jam shumë i gëzuar për këtë vendim dhe i lumtur, që jam në këtë ekip dhe që ne e morëm çmimin, sepse kishte shumë kohë që për ne diskutohej si kandidatë. Dhe unë jam i bindur, se puna jonë e çon përpara shkencën."
Në argumentimin e çmimit thuhet se çmimi ofrohet për "zbulimin e parimeve për futjen e ndryshimeve specifike te minjtë, duke përdorur qeliza bazë embrionale". E shprehur në fjalë më të thjeshta, tre shkencëtarët u dekoruan për teknikën e tyre, me të cilën në mënyrë të qëllimshme tek minjtë laboratorikë deaktivizohen gene të caktuara, metodë që përdoret për studimin e funksioneve të tyre. Kjo mund të krahasohet me largimin e një ingranazhi me dhëmbë nga një orë. Nëse pjesa që ndalon punën është veçanërisht e rëndësishme, e gjithë ora ndalon dhe nuk punon më. Në rastin e një ingranazhi tjetër, mund të mos punojë më p.sh. akrepi i sekondave, ndërsa pushimi i punës së një ingranazhi të tretë i heq orës vetëm saktësinë e matjes së kohës. Ai që nuk e njeh orën, me këtë metodë mëson se për cilat funksione është përgjegjës një ingranazh i caktuar.
Zbulimi i tri shkencëtarëve, thotë Urban Lehndal, anëtar i Komitetit të Nobelit, ka rëndësi epokale për luftimin e sëmundjeve të trashëgueshme: "Bëhet fjalë për një teknologji, e cila na jep mundësinë, të analizojmë çdo gen të DNA-së sonë, dhe të tilla ka rreth 20 mijë deri 25 mijë. Deri tani, për ne ka qenë e vështirë që të kuptojmë, se çfarë funksioni ka një gen i caktuar, por të tri shkencëtarët arritën, që ne ta deaktivizojmë një gen të caktuar dhe të mund ta ndryshojmë atë. Dhe me këtë, ne kemi mundësi fantastike, të kuptojmë sëmundjet gjenetike dhe t'i shërojmë ato."
Zbulimi revolucion shkencor
Që vitin e kaluar u nderua me çmim puna e dy shkencëtarëve gjenetikë: Endrju Fajer (Andrew Fire) dhe Krejg Mellou (Craig Mellow) zhvilluan një metodë, me të cilën genet mund të deaktivizohen në mënyrë të qëllimshme. Me metodën e zbuluar tani nga tri shkencëtarët, kalohet në një epokë të re, thotë Urban Lehndal, i cili gjithashtu është profesor i gjenetikës. "Tani ne mund të zbulojmë edhe sëmundje, në të cilat merr pjesë vetëm një gen, si për shembull në deformimet e ndryshme dhe në sëmundjet e qarkullimit të gjakut. Në rastin e diabetit, në të ardhmen mund të kuptohet se çfarë ka ecur gabim nga ana gjenetike, kështu që mund të flitet për një revolucion shkencor, që ndodh me këto zbulime."
Marre nga : Dw-World.de
